Алғабас ауылындағы өрттен аман алған үш адам жансақтау бөлімінде жатыр

Жетісай ауданы Алғабас ауылындағы өрттен аман алған үш адам жансақтау бөлімінде жатыр. Түркістан облысының денсаулық сақтау басқармасының хабарлауынша, үшеуінің де жағдайы ауыр.

«Медициналық мекемелерге үш адам – екі ересек және бір бала жеткізілді. Барлығы реанимация бөлімінде жатыр, жағдайы ауыр, бірақ тұрақты. Науқастарға интенсивті терапияның толық кешені жүргізіліп жатыр, олардың жағдайы салалық мамандардың толық бақылауында», – деп хабарлады мамандар.

Облыстық денсаулық сақтау мекемелерінен қосымша мамандар тартылып, қажетті дәрі-дәрмекпен және психологиялық қолдаумен қамтамасыз етілді.

18 қараша таңертең Алғабас ауылындағы екі қабатты жеке тұрғын үйден 12 адамның мәйіті табылды.

Президент Қасым-Жомарт Тоқаев марқұм болғандардың туыстарына көңіл айтты.

Түркістан облысы полициясы «Өрт қауіпсіздігі талаптарын бұзу» бабы бойынша қылмыстық іс қозғады. 

Бала құқықтары жөніндегі уәкіл Динара Зәкиеваның сөзінше, үйде екі отбасы мүшелері – ата-анасы мен балалары болған. Өрт шығып, шатыр опырылып түскен.