Үндістанда ондаған баланың өмірін жалмаған Coldrif тұмауға қарсы үнді шәрбаты Қазақстанда тіркелмеген. Дәрілік заттар мен медициналық бұйымдарды сараптау ұлттық орталығы Kursiv.Media сауалына осылай деп жауап берді.
Қауіпті дәрі саудада жоқ
«Қазақстан дәрілік заттардың мемлекеттік тізілімінде Coldrif жөтелге арналған шәрбаты (белсенді заттары: парацетамол, фенилэфрин, хлорфенирамин), өндірушісі Sresan Pharmaceutical (Үндістан), тіркелмеген», – делінген ұлттық орталық жолдаған жауапта.
Бұған қоса, препаратты ұлттық талаптар бойынша немесе Еуразиялық экономикалық одақ шеңберінде тіркеуге арналған өтініштер Ұлттық сараптама орталығына түспеген. Осыған байланысты Coldrif препараты Қазақстанда айналымда жоқ деуге болады.
Нормадан ондаған есе жоғары
Осының алдына Kursiv.Media жөтелді басуға көмектеседі деп сатылған үнді шәрбатынан химиялық улы заттар табылғанын, соның салдарынан Үндістанда 24 бала көз жұмғанын жазған.
Ашық дереккөздерде Coldrif шәрбатының кейбір партияларында диэтиленгликоль мөлшері 48,6 пайызға жеткені хабарланған. Қазақстандағы орталық мамандары мұндай көрсеткіш «рұқсат етілетін 0,1 пайыздық нормадан ондаған есе жоғары» екенін айтып отыр.
Дүниежүзілік денсаулық сақтау ұйымының (ДДСҰ) мәліметінше, диэтиленгликольмен улану іштің ауыруы, құсу, диарея, сананың өзгеруі, несеп шығарудың бұзылуы және өлімге әкелуі мүмкін жедел бүйрек жеткіліксіздігімен сипатталады. Осы жағдайдан кейін Үндістанның бірнеше штаты препараттың таралуын тоқтатып, лицензияны жою туралы бастама көтерген.
Саудадағы дәрі-дәрмектер қалай тіркеледі?
Мекеме Қазақстанда дәрілік затты нарыққа шығару алдында оның қауіпсіздігі, тиімділігі мен сапасы бірнеше кезеңнен тұратын сараптамадан өтетінін атап өтті. Тіркеуден кейін препараттың әрбір сериясы тексеріледі. Дәрілердің бәрі саудаға жіберіле бермейді.
«2025 жылғы деректер бойынша, мемлекеттік тіркеуге түскен өтінімдердің 4%-ы қауіпсіздік, тиімділік немесе сапа талаптарына сәйкес келмегендіктен теріс қорытынды алған», – деп мәлімдеді орталық.
Бұған қоса, мекемедегілер препарат нарыққа шыққаннан кейін де олардың қауіпсіздігі тұрақты бақылауда ұсталатынын ескертті. Қауіпті екені анықталса, сапасы күмәнді дәрілер айналымнан шығарылып, халық денсаулығына қауіп келтірмеу үшін тиісті шаралар қолданылады.
Мамандар кеңесі
Ұлттық орталық азаматтарға дәрілік заттарды лицензиясы бар дәріханалардан сатып алуға, оның мемлекеттік тіркеуде болуы мен сәйкестік сертификатының бар-жоғын тексеруге және ДДСҰ қауіпті деп таныған көрсетілген шәрбаттарды қолданбауға кеңес береді.
Бұған дейін Kursiv.Media тұмауратқан балаға қалай көмектесу керектігі туралы бала дәрігерінің пайдалы кеңестерін жариялаған.
