Ресей азаматтары Ақтөбенің орнына Ақтауға қонған ұшақтан түсуден бас тартты

Ресей азаматтары ауа райына байланысты Ақтөбенің орнына Ақтауға қонған ұшақтан түсуден бас тартты. Ұшақ Ыстамбұлдан Ақтауға ұшып келе жатқан, деп хабарлады Ақтау әуежайы.

Baza арнасының жазуынша, Ыстамбұл-Ақтөбе рейсін Түркияның Pegasus авиакомпаниясы алдымен сегіз сағатқа кешіктіріп, ұшақ ұшқаннан кейін межелі Ақтөбеге емес, Ақтауға қонған.

«Рейс экипажы жолаушыларға ұшу аяқталғанын және ұшақтан кететін уақыт келгенін айтқан. Бортта Ресей мен Қазақстан азаматтары болған. Бірақ стюардессалар мен ұшқыш табанды түрде ұшақтан шығуларын сұраған. Нәтижесінде қазақстандықтар ұшақтан шығып, Ақтөбеге өздері аттанған. Ал 40 шақты ресейлік азамат, олардың ішінде бес бала салоннан кетпей қойған», – деп жазады Baza.

Ақтау халықаралық әуежайының ақпаратына сүйенсек, ұшақ ауа райына байланысты Ақтөбеге қона алмағандықтан, кері бұрылып, Ақтауға қонған. Әуе компаниясының өкілдері жолаушыларға қонақ үйге қону немесе Ақтөбеге тасымалдау туралы ұсыныс жасаған. 16 жолаушы әуе кемесінен бас тартып, бортта қалған.

Жолаушыларға авиакомпанияның өкілдігі ұшуы 3 желтоқсанға жоспарланған Ақтау-Ақтөбе рейсіне билеттерді ресімдемек. Әуежай тіркеу аяқталғаннан кейін жолаушылар ұшақтан шығады деген үмітте.