Өңдеу кәсіпорындарына 196 мыңға жуық киік еті өткізілді

Қазақстанда бес ай ішінде 196 мың бас киіктің ұшасы тәркіленіп, олардың еті отандық ет өңдеу кәсіпорындарына тапсырылды. Бұл туралы Премьер-Министрдің баспасөз қызметі хабарлады.

Экология министрлігінің мәліметінше, қазіргі таңда ақбөкендердің саны 4 миллионға жеткен. Көктемгі төлдеу кезеңінен кейін бұл көрсеткіш 5 миллионға дейін артады деп күтілуде.

«Осы жылы 1 шілдеден 30 қарашаға дейін 196 мыңға жуық дарақ тәркіленді, ұшалары отандық ет өңдеу кәсіпорындарына берілді. Жұмыстар ғылыми ұсынымдарға сәйкес қатаң түрде жүргізілді», – делінген хабарламада.

Барлық ауланған киіктің мүйізі арнайы таңбаланып, «Охотзоопром» кәсіпорнына тапсырылды. 1 желтоқсаннан бастап олардың мүйіздерін міндетті таңбалау жобасы іске асырылады. Ұсынылған жүйе CITES Халықаралық конференциясында қолдау тапты және қазақстандық дериваттардың экспортына шектеулерді кезең-кезеңімен алып тастау үшін негіз ретінде қарастырылады.

Маусым айының соңында Қазақстанда ақбөкендер санын реттеу туралы шешім қабылданғаны белгілі болды. Сол кезде олардың саны 3,9 млн басқа жеткен еді. Атып алу туралы шешім фермерлердің егіннің жойылуына байланысты шағымдары мен ғылыми қорытындылар негізінде қабылданған.

Айта кетейік, алдағы уақытта киік еті супермаркет сөрелерінде сатылуы мүмкін. Ауыл шаруашылығы вице-министрі Аманғали Бердалин елде жүргізілген ветеринарлық мониторинг нәтижесінде жануарлар арасында ауру анықталмағанын айтты. Сондықтан киік етін сатуға шектеу жоқ.