Қазақстанда «Жасыл ипотекаға» сұраныс артты. Бағдарлама тиімді ме
2025 жылы қазақстандықтар «Жасыл ипотека» бағдарламасы аясында 14,7 млрд теңгеге 570 несие рәсімдеді. Ең көп несие Астана қаласында берілген. Бұл туралы krisha.kz ақпаратында айтылған.
Бағдарлама іске қосылған 2023 жылдан бері 46,1 млрд теңгеге 1825 жасыл ипотека берілді.
«Жасыл ипотека» деген не?
«Жасыл ипотека» – Отбасы банкінің энергия тиімді және экологиялық тұрғыдан таза тұрғын үй сатып алуға арналған бағдарламасы.
Халықаралық LEED, BREEAM, ГОСТ Р стандарттары немесе қазақстандық OMIR стандарты бойынша сертификатталған тұрғын үй жасыл деп саналады. Бұл сертификатты KazGBC – Қазақстанның жасыл құрылыс кеңесі береді.
Тұрғын үй кешендері «жасыл» сертификатты мына негізгі талаптарға сай келген жағдайда алады:
- Энергия тұтыну – жылу оқшаулау мен заманауи жүйелердің арқасында төмен болады.
- Экологиялық материалдар – қауіпсіз әрі қайта өңделетін құрылыс материалдары пайдаланылады.
- Су және ресурстар – ресурстарды үнемді пайдалану және қайта қолдану қарастырылған.
Бұл халықаралық және ұлттық стандарттардың әрқайсысында нысанның экологиялық және энергия тиімділік деңгейін білдіретін сертификаттау сатылары бар. Ең төменгі деңгей – «күміс», орташа – «алтын», ең жоғары – «платина».
«Жасыл ипотеканың» шарттары:
- Максималды қарыз сомасы – 50 млн теңгеге дейін
- Бастапқы жарна – 20%-дан бастап (тұрғын үй төлемдерін алушылар үшін 15%-дан)
- Пайыздық мөлшерлеме – жылдық 12,5% (ЖТСМ 13,3–18,1%)
Қарыз сомасының 50%-ын жинағаннан кейін пайыздық мөлшерлеме жылдық 3,5–5% деңгейіне дейін төмендейді (ЖТСМ — 3,6–6,9%).
Арнайы мөлшерлемелер:
- I, II, III топтағы мүгедектігі бар азаматтар үшін – 7% (ЖТСМ — 7,3–8,4%).
Егер тұрғын үй кешенінің «алтын» деңгейінен төмен емес сертификаты болса:
- Кезекте тұрғандар үшін – 7% (ЖТСМ – 7,3–8,4%).
- Тұрғын үй төлемін алушылар үшін – 11% (ЖТСМ – 12,1–15%).
Маңызды: пәтер сатып алар алдында тұрғын үй кешенінің OMIR немесе басқа халықаралық стандарттар бойынша сертификаты бар-жоғын тексеру қажет, бұл бағдарламаға қатысудың міндетті шарты.
«Жасыл ипотекамен» пәтерді қайдан сатып алуға болады?
Бағдарлама бойынша тұрғын үй кешендерін Астана, Алматы, Шымкент, Қошы, Түркістан, Шығыс Қазақстан, Абай, Жетісу, Алматы және Ақтөбе облыстарынан сатып алуға болады.
Еске салайық, «Ұмай» ипотекалық бағдарламасының шарттары келісу сатысында тұр. Жоба Азия даму банкімен бірлесіп іске асырылады. Жеңілдікті шарттар бойынша тұрғын үй сатып алғысы келетін әйелдерді қолдауға бағытталған.
