QAMS қауымдастығы «Самұрық-Қазынаның» жұмысына ЖИ-дің қатысуынан инвестициялық қауіп бар ма деп алаңдайды. Осы мәселе бойынша Қаржы нарығын реттеу және дамыту агенттігіне сұрау салды.
Миноритарлық акционерлер қауымдастығы Қаржы нарығын реттеу және дамыту агенттігінен төмендегі мәселелер бойынша ресми сараптамалық қорытынды беруді сұрайды:
- «Самұрық Қазына» Директорлар кеңесінің құрамына ЖИ қатысуы қаншалықты заңды
- одан құнды қағаз иелері үшін қандай қауіп бар
- бұл тәжірибенің корпоративтік басқару мен құнды қағаздар нарығындағы заңнаманың сақталуына ықпалы қандай
- құқықтық белгісіздік болмау үшін құқықтық-нормативтік базаны реттеудің қажеті бар ма
Инвесторлар директорлар кеңесінің құрамында ЖИ болуы «Самұрық-Қазынаның» несие рейтингіне, қордың инвестициялық тартымдылығына, халықаралық инвестор тарапынан қызығушылыққа қаншалықты ықпал етуі мүмкін деген сұраққа жауап беруді сұрайды.
Бұған дейін QAMS қауымдастығы осы мәселемен Бас прокуратураға ресми сұрау жолдаған еді. Олар Қазақстанда жасанды интеллектің құқықтық мәртебесіне байланысты үлкен заңдық проблема туындауы мүмкін деп қауіптенеді.
