Қытай Қазақстанның мал етін импорттау үшін инспекция жүргізді

Қазақстаннан алдағы уақытта Қытайға ірі қара етінің экспорты артуы мүмкін. Ауыл шаруашылығы вице-министрі Аманғали Бердалиннің айтуынша, жауапты ведомство қазір ет сапасын анықтайтын зертхана қызметкерлерінің жалақысын арттырып, зерттеуді көбейтіп, халықаралық сертификаттарды алуға тырысып жатыр.

Бердалиннің сөзінше, биыл солтүстік-батыс өңірдегі ауылдан таза аумақтың мәртебесін тану үшін Дүниежүзілік жануарлар саулығы ұйымына дерекнеме жіберілген. Алынған саламаттылық мәртебесі отандық өндірушілердің экспорттық әлеуетін арттыруға мүмкіндік берген.

«Биыл 16 ветеринариялық сертификат келісіліп, қол қойылды, бұл мал шаруашылығы өнімдерін экспорттауға мүмкіндік береді. Жалпы қазақстандық мал шаруашылығы өнімін Еуропалық Одақ елдеріне, Ұлыбритания, Ирак, Иран, АҚШ, Канада және басқа да бағыттарды қоса алғанда, 42 елге жеткізуге болады», – дейді ол.

Бердалиннің сөзінше, Қытаймен экспорт бойынша хаттамаларға қол қойылған. Оған сәйкес, сойылған ірі қара мал, мұздатылған құс еті, салқындатылған, термиялық өңделген шошқа еті және қосалқы өнімдерді, термиялық өңделген қой мен ешкі етін көрші елге экспорттауға болады.

Вице-министр сонымен қатар, Қытай тарапынан отандық өнімді экспорттау мүмкіндігіне инспекция жүргізілгенін, тексеру нәтижелері күтіліп отырғанын мәлімдеді. Бүгінгі таңда шет елдердің тізіліміне өз өнімін экспорттай алатын 3 728 қазақстандық кәсіпорын енгізілген.