Қазақстанның курорттық аймақтарына 3,8 миллионнан астам турист келді
2025 жылдың қаңтар-қыркүйек айлары аралығында Қазақстанның курорттық өңірлерінде 3,8 млн адам демалып, өткен жылдың сәйкес кезеңімен салыстырғанда туристер саны 14%-ға артты. Бұл туралы Ұлттық статистика бюросы хабарлады.
Жалпы келушілердің 16,5%-ын шетелдік туристер құрады, бұл қазақстандық курорттардың халықаралық деңгейде де сұранысқа ие екенін көрсетеді.
Ең танымал курорт – Алматы тау кластері
Туристер арасында ең көп сұранысқа ие орын – Алматы тау кластері болды. 2025 жылдың алғашқы тоғыз айында бұл аймаққа 2,2 млн адам келген. Бұл өңірдің экотуризм, тау шаңғысы және қала маңындағы демалыс бағыттарымен танымал екені белгілі.
Бурабай мен Маңғыстау – үздік үштікте
Екінші орында – Щучье-Бурабай курорт аймағы. Табиғаты көркем, орманды және көлді аймақта 373,1 мың турист демалған.
Үшінші орында – Каспий теңізінің жағалауына жақын орналасқан Маңғыстау курорт аймағы. Мұнда 308,8 мың адам тыныққан.
Басқа танымал аймақтар
Туристер арасында Балқаш көліне жақын орналасқан Балқаш туристік аймағы да танымал, оған 169,2 мың адам келген. Ал Жетісу облысындағы Алакөл курорт аймағына 147,1 мың турист барған.
Табыс – 154,7 млрд теңге
Курорттық аймақтарда туристерге қызмет көрсеткен орналастыру орындарының табысы 154,7 млрд теңгеге жеткен. Қазіргі таңда Қазақстанда туристерді қабылдайтын 1 876 нысан жұмыс істейді.
Айта кетейік, осыған дейін Қазақстанның 7 өңіріндегі тау-шаңғы локациялары жайлы жазған едік.
