Павлодар облысында педофил 20 жылға сотталды

Павлодар облысының тұрғыны балаға зорлық көрсеткені үшін 20 жылға сотталды. Істі өңірдің мамандандырылған ауданаралық қылмыстық соты қарады. Соттың баспасөз қызметі хабарлағандай, процесс жабық режимде өтті.

«Ер адам баланың дәрменсіз жағдайын пайдаланып, кәмелетке толмағандарға жасалған зорлық үшін кінәлі деп танылды. Кінә жәбірленушінің айғақтарымен, куәгерлермен, сараптамалардың қорытындыларымен және сотта зерттелген басқа да дәлелдермен дәлелденді. Қылмыс аса ауыр санатқа жатады және 20 жылға бас бостандығынан айыру немесе өмір бойына бас бостандығынан айыру түріндегі жазаны қарастырады», — деп түсіндірді сотта.

Сотталушыға бұдан әрі педагогикалық лауазымдарды атқаруға және кәмелетке толмағандармен жұмыс істеуге тыйым салынады. Сотталған адам орташа қауіпсіздік қылмыстық-атқару жүйесі мекемесінде мерзімін өтейтін болады.

Үкім әлі заңды күшіне енген жоқ.