Ұлыбритания «Татнефтьке» қарсы санкция енгізді: Қазақстанға қалай әсер етеді

Ұлыбритания санкция тізіміне ресейлік «Татнефть» және «Русснефть» мұнай компанияларын енгізді. Бұл туралы Ұлыбританияның қаржы министрлігі хабарлады.

Активтерді бұғаттауды көздейтін санкцияларға «Руснефтегаз» компаниялары мен «Независимая нефтегазовая компания» да түсті.

Лицензияға сәйкес, Лондон аталған компаниялармен және олардың еншілес құрылымдарымен операцияларды тоқтату үшін 2026 жылдың 31 қаңтарына дейін мерзім белгіледі.

Тағы кім санкцияға ұшырады

Сонымен қатар, санкция тізіміне Дубайда тіркелген, шикізат жеткізу саласында жұмыс істейтін сауда компаниялары кірді: Tejarinaft FZCO, Fossil Trading FZCO, AMUR II FZCO, ALTRUM Group FZCO, Mercantile & Maritime Group, Redwood Global Supply FZ-LLC және Saphira Energy FZE.

Сондай-ақ, мақта өндірісіне мамандандырылған өзбекстандық кәсіпорындар санкцияға ұшырады: Ферғана химиялық зауыты, Gelion business trade, Chemistry International және Raw Materials Cellulose.

Бұған дейін Лондон шикізат жеткізумен және Ресей экономикасын қаржыландырумен байланысты компанияларға қатысты санкция режимін қатаңдатуды жалғастыру ниеті туралы мәлімдеген болатын.

Қазақстандық жобаларға қауіп

«Қазақстанның мұнай және Газ» Telegram-арнасы атап өткендей, Қазақстандағы мұнай-химия және мұнай барлау жобаларына қауіп төнуі мүмкін. Себебі «Татнефть» «Қазмұнайгазбен»тығыз жұмыс істейді. Екі компания бірге Атырау облысындағы Қаратон Подсолевой учаскесінде барлау және бұрғылау жұмыстарын жүргізеді. Бір жыл бұрын ол жерде тереңдігі 5,5 км болатын алғашқы ұңғыма бұрғылана бастады. Бұл учаске Қазақстандағы ең ірі кен орындарының бірі Теңіз және Ембі кен орындарының жанында орналасқан.