18 желтоқсанда «Шымбұлақ» тау курортының қысқы маусымдағы жұмысын таныстыруға арналған баспасөз туры өтті. Іс-шара барысында Kursiv LifeStyle журналисі курорттың сервистік және инженерлік инфрақұрылымындағы негізгі жаңалықтарымен танысып қайтты.
Рекорд орнатқан маусым
Өткен маусымда Shymbulak 1,5 млн-нан астам қонақ қабылдап, өзінің рекордтық көрсеткішіне қол жеткізді. Осылайша, курорт 2030 жылға жоспарланған межені мерзімінен бұрын орындады. Туристер санының тұрақты өсуі сервисті жаңғырту, инженерлік жүйелерді жетілдіру және қауіпсіздік стандарттарын күшейту қажеттігін арттыра түсіп отыр.
Сервис пен инфрақұрылым: миллиондаған қонаққа дайындық
Баспасөз туры «Медеу» базалық станциясынан басталды. Қайта жаңғыртудан кейін сырғанау жабдықтарын жалға беру осы жерге ауыстырылды. Жалға беру қызметінің супервайзері Мүслим Жұмаевтың айтуынша, қызмет көрсету «бір терезе» қағидатымен жүзеге асырылады, ал локерлер саны екі есеге артқан.
«Қонақтар саны жыл сайын артып келеді. Сондықтан сырғанауға дейінгі рәсімдерге кететін уақытты қысқарту – басты міндет. Биыл жабдықтар толық жаңартылды, бұл қызмет сапасын едәуір арттырды», – деді ол.
Сондай-ақ Орта станцияда жаңа павильон ашылып, онда кафе мен дүкен жұмыс істейді. Freedom Telecom қолдауымен курорттың негізгі станциялары мен аспалы жол бойында тегін Wi-Fi нүктелері іске қосылды.
2025–2026 маусымынан бастап Shymbulak-та цифрлық кері байланыс жүйесі енгізілді. Қонақтар QR-код арқылы пікір қалдырып, ұсыныстарын айта алады.
«Пікір жинау мен талдауды автоматтандыру сервисті объективті бағалап, әлсіз тұстарды жедел түзетуге мүмкіндік береді», – деді Клиенттік сервис және сапаны бақылау департаментінің басшысы Ольга Беляева.
Қауіпсіздік – басты басымдық
«Шымбұлақ» станциясында журналистерге тау шаңғысы және сноуборд мектебінің жұмысы таныстырылды. Биыл мұнда 100-ден астам инструктор еңбек етеді, сабақтар қазақ, орыс және ағылшын тілдерінде өтеді. Жаңадан бастаушылар үшін бір сағаттық топтық сабақ тегін ұсынылады.
«Алғашқы қадамдар қауіпсіздікке тікелей әсер етеді. Сондықтан кәсіби инструктормен бастау өте маңызды», – деді мектеп жетекшісі Николай Хан.
Бағасы мен тарифтер
Бірнеше жыл бойы Shymbulak-та ски-пасстардың құны өзгермеген. Тарифтерге түзету тек 2024-2025 маусымында енгізілді. Билет бағасы биік таулы инфрақұрылымды пайдалану, аспалы жолдарға қызмет көрсету, техниканы жаңарту және қауіпсіздікті қамтамасыз ету шығындарымен тікелей байланысты. Биылғы өзгерістер инфляцияның, ҚҚС мөлшерлемесінің өсуін және шетел валютасына сатып алынатын импорттық жабдықтардың қымбаттауын толық өтемейді.
Қолжетімділікті қамтамасыз ету үшін курорт халықаралық тәжірибеге сай сараланған тарифтерді (low / regular / high), сондай-ақ таңғы, күндізгі және түнгі тарифтерді, бастаушыларға арналған арнайы тариф пен балаларға жеңілдіктер ұсынады. «Төмен» (low) маусымда сырғанау құны орта есеппен 30%-ға дейін төмендеп, қонақтарға жүктеме аз күндерді таңдауға мүмкіндік береді.
Техникалық дайындық және халықаралық тәжірибе
Қонақтар санының өсуіне байланысты Shymbulak инженерлік жүйелерді жаңартуға ерекше назар аударып отыр. Жаңартылған ратрак паркі, жасанды қар жасау жүйелері мен аспалы жолдардың жұмысы көрсетілді. Биыл курорт халықаралық PGI Management компаниясымен серіктестік орнатты.
«Халықаралық тәжірибе Shymbulak-ты әлемдік стандарттармен салыстыра отырып дамытуға мүмкіндік береді», – деді PGI Management өкілі Роман Серра.
Әлеуметтік және экономикалық рөл
Shymbulak – өңірдегі ірі жұмыс берушілердің бірі. Қысқы маусымда мұнда мыңнан астам адам жұмыс істейді. Өткен жылы курорт әлеуметтік осал топтардан 190 мыңға жуық қонақ қабылдады, бұл жалпы келушілердің шамамен 20%-ы.
Алматы қаласы әкімдігі мен Mastercard деректеріне сәйкес, 2025 жылы Алматыға келген әрбір үшінші шетелдік турист Shymbulak-ты таңдаған.
Еске сала кетейік, «Медеу» мұз айдыны жөндеу жұмыстарына жабылғаннан кейін Шымбұлақта теңіз деңгейінен 2 260 метр биіктікте орналасқан жаға мұз айдыны ашылған еді.
