Астана қаласының индустриалдық аймақтары елорда экономикасының қозғаушы күшіне айналып жатыр. 24 желтоқсан күні Тоқаев №1 Индустриалдық паркте болып, қаланың құрылыс және технологиялық әлеуетін арттырып отырған бірқатар кәсіпорынның жұмысымен танысты.
Президент сапарының басты нысандарының бірі – Tausogar зауыты болды. Бұл кәсіпорын құрылыс саласына қажетті күрделі техникаларды шығарумен айналысады. Бүгінде зауыт жылына:
- 200 лифт;
- 70 эскалатор;
- 70 мұнара кранын өндіруге қауқарлы.
Зауыттың 44 жоғары білікті маманымен кездескен Президент кәсіпорынның инфрақұрылымды дамытудағы маңызын атап өтіп, отандық өнімнің бәсекеге қабілеттілігіне сенім білдірді.
Сонымен қатар Мемлекет басшысына өңірдегі басқа да ірі жобалар таныстырылды. Атап айтқанда:
- «Гипсовинил» зауытының винилді гипсокартон панельдері;
- QR Systems кәсіпорнының өрт дабылдары мен бейнебақылау жүйелері;
- «Астана электротехника зауыты» мен «Арыстан» Астана құбыр зауытының өнімдері көрсетілді.
Болашақ жоспар: №2 Индустриалдық паркі және жаңа жұмыс орындары
Президентке Астананың өндірістік аймақтарын кеңейту жоспары да баяндалды. Мемлекет-жеке меншік серіктестік аясында құрылатын №2 Индустриалдық паркінде жалпы құны 500 миллиард теңгеден асатын 100-ден астам жоба іске асырылмақ. Бұл бастама 8 мыңға жуық жаңа жұмыс орнын ашуға мүмкіндік береді.
Сонымен қатар, логистика саласын дамыту мақсатында «Астана-Технополис» арнайы экономикалық аймағында жаңа логистикалық парк құрылады. Жалпы алғанда, елорданың даму пулы аясында құны 1,9 триллион теңге болатын 120 жоба жүзеге асырылып, нәтижесінде 22 мыңға жуық адам жұмыспен қамтылмақ.
