Chery концернінің құрамындағы премиум санаттағы Exeed бренді Қытайда ауқымды Exeed Brand Night шарасын өткізді. Іс-шара барысында компания төрт жаңа моделін таныстырды. Олардың қатарында ES7 GT және ES8 универсалдары, сондай-ақ ET8 пен ET9 кроссоверлері бар.
Бұл модельдердің нарыққа шығуы алдағы 10–20 ай аралығына жоспарланған. Яғни, ұсынылған жаңа көліктердің алғашқысы 2026 жылдың екінші жартысында сатылымға шығуы мүмкін.
Exeed ES7 GT – бұл Exlantix ES седанының негізінде жасалған модель, бірақ оның кузов типі мен қуаттылығы жағынан едәуір ерекшеленеді. GT индексі бұл универсалдың жоғары динамикасын білдіреді: бес есікті көлік 100 км/сағ жылдамдыққа шамамен 3 секундта жетеді. Көлік төрт қозғалтқышты гибридті жүйемен жабдықталған, оның жалпы қуаты шамамен 540 ат күшін құрайды. Сонымен қатар, модельге пневматикалық аспа мен жылдам қуаттау жүйесі орнатылады.
Exeed ES8 – дизайн жағынан болашаққа бағытталған футуристік стильмен ерекшеленеді, бірақ техникалық сипаттамалары туралы ақпарат әзірге аз.
Мысалы, 100 км/сағ дейін үдеу уақыты ES7 GT моделіне қарағанда сәл баяу – 3,3 секунд. Бұл модель толық электрлі болады.
Болашақта Chery компаниясы әзірлеген қатты күйдегі аккумуляторлармен жабдықталады, олардың арқасында көлік бір қуаттаумен 1000 км-ге дейін жүре алады. Сондай-ақ, адаптивті амортизаторлар мен басқарылатын артқы дөңгелектер қарастырылған.
Exeed ET8 кроссовері бұған дейін де таныстырылған, бірақ бұл жолы ол бұрыштылау кузов дизайны және ерекше жарық жүйесімен жаңаша түрге енген. Мұндай өзгерістер оның жаңа буын ретінде шығуы мүмкін екенін көрсетеді.
Ал көлемі жағынан ірі ET9 моделі тіпті футуристік стильде жасалған, әсіресе артқы жағына орнатылған есік топсалары (артқа ашылатын есіктер) ерекше көзге түседі.
Бұл екі жол талғамайтын көлік жаппай өндірісте 2027 жылдан ерте шықпайды деген болжам бар.
Еске салайық, осыған дейін Exeed бренді жаңа Exlantix ET5 гибридіне алдын ала тапсырыс қабылдаудың басталғанын хабарлаған болатын.
