Әділет министрі Ерлан Сәрсембаев Үкіметте 2026 жылы қандай заңдар шығатынын айтып берді.
Үкіметте баяндама жасаған министр 2026 жылға арналған заң жобалау жоспары азаматтарды цифрлық трансформациялау мен әлеуметтік қорғау міндеттерін ескере отырып әзірленгенін айтты.
«Парламентке бірінші жартыжылдықта 5, екінші жартыжылдықта 7 заң жобасын енгізу жоспарлануда. Президенттің әлеуметтік салаға да, цифрлық дамуға да қатысты тапсырмаларын сапалы пысықтауға басымдық берілді», – деп атап өтті министр.
Жоспарда 12 заң жобасын әзірлеу қарастырылған. Олардың негізгілері нақты әлеуметтік және экономикалық міндеттерді шешуге бағытталған. Әлеуметтік қорғау саласында тұрғын үйді табиғи апаттардан міндетті сақтандыру туралы заң, сондай-ақ еңбек заңнамасына және әлеуметтік қамсыздандыру жүйесіне түзетулер әзірленіп жатыр.
Президенттің тапсырмаларын орындау шеңберінде мемлекеттік мүлік мәселелері бойынша түзетулер және онлайн-платформалар мен масс-медиа мәселелері туралы заңнама дайындалады. Өнеркәсіп блогында мұнай-газ химиясы өнеркәсібі туралы заң жобасын енгізу жоспарланған.
