Ресейде әскери қызметке жыл бойы шақыру туралы бұйрық шығарды
Ресейдің Қорғаныс министрлігі азаматтарды мерзімді әскери қызметке жыл бойы шақыру туралы бұйрық шығарды.
Құжатқа қорғаныс министрі Андрей Белоусов қол қойған. Бұйрық ведомствоның Telegram-арнасында жарияланды.
Құжат 2026 жылғы әскерге шақыруға, сондай-ақ мерзімді әскери қызметін өтеп жүрген азаматтарды қызметтен босатуға қатысты. Ол Ресей президенті Владимир Путиннің тиісті жарлығын орындау аясында шығарылған.
«Ресей Федерациясы президентінің жарлығын орындау мақсатында мынадай бұйрық беремін: әскери округтер әскерлерінің қолбасшылары мен әскери комиссарлар Ресей Федерациясы субъектілерінің атқарушы органдарымен және жергілікті өзін-өзі басқару органдарымен бірлесе отырып, 2026 жылғы 1 қаңтардан 31 желтоқсанға дейін Ресей Федерациясының Қарулы күштеріне, басқа да әскерлерге, әскери құрамалар мен органдарға әскери қызметке шақырылуға жататын, запаста тұрмайтын 18 бен 30 жас аралығындағы Ресей Федерациясы азаматтарын шақыруды ұйымдастырып, өткізуді қамтамасыз етсін», – делінген құжатта.
Осы бұйрыққа сәйкес, мерзімді әскери қызметінің белгіленген уақыты аяқталған сарбаздар, матростар, сержанттар мен старшиналар әскери қызметтен босатылуы тиіс.
«Бұйрық барлық ротада, батареяларда, эскадрильяларда және кемелерде жариялансын», – деп көрсетілген құжатта.
Бұған дейін, бір күн бұрын Владимир Путин 2026 жылы әскери қызметке шақыру туралы жарлыққа қол қойған еді. Осылайша, әскерге шақыру алғаш рет жыл бойы жүргізіледі.
Мұның алдында Ресей Путин резиденциясына дрондар шабуылдағанын мәлімдеген еді.
