Мектеп директоры мұғалімдерден қарыз алғаны туралы ақпарат тексеріледі
Әлеуметтік желілерде Жетісу облысы Көксу ауданындағы мектептердің бірінде мектеп директоры қызметкерлерден қарызға ақша алып қайтармаған деген ақпарат тарады. Әлеуметтік желілердегі мәліметтерге сәйкес, 20-ға жуық адам зардап шекті.
ҚазАқпарат мәліметіне сүйенсек, Қызылтоған кентіндегі орта мектептің директоры бірнеше жыл бойы педагогтар мен техникалық персоналдан қарызға алған ақшалай қаражатты қайтармаған.
Мектеп директорына ресми шағым Көксу ауданының білім бөліміне 30 желтоқсанда тоғыз педагогтан келіп түскен. Содан кейін ол Көксу ауданының полиция бөліміне жіберілген.
«Тергеу іс-шараларын өткізуге байланысты Көксу ауданының білім бөлімі 2026 жылғы 5 қаңтарда ауылдық мектеп директорының қызметтік міндеттерін уақытша шектеу туралы №1 бұйрық шығарды», – деп хабарлады Жетісу облысының білім басқармасы.
Полиция өтініш беру фактісін растады және қазіргі уақытта болған оқиғаның барлық мән-жайларын анықтау жалғасып жатқанын атап өтті.
