Рудныйдағы шахтада жарылыс кезінде жұмысшы жарақат алды

Рудный қаласындағы «Соколов» шахтасында «Соколов-Сарыбай кен-байыту өндірістік бірлестігі» АҚ-ның қызметкері жарылыс жұмыстары кезінде жарақат алды.

Компанияның баспасөз қызметінің мәліметінше, шахтада ірі көлемді кен кесектерін жою кезінде жарылғыш заттар қолданылған. Жұмыс барысында бақылаусыз жарылыс орын алып, скрепер механизмін басқарушы машинисі жарақат алды.

Зардап шеккен қызметкерге қалалық ауруханада медициналық көмек көрсетілуде. Полиция еңбек қауіпсіздігі ережелерінің бұзылуы фактісі бойынша қылмыстық іс қозғады. Тергеу аясында құқық қорғау органдары оқиғаның барлық мән-жайын анықтап, құқықтық баға береді.

Еске салайық, Қарағандыдағы «Костенко» шахтасында 46 кеншінің қазасына кінәлі деп танылғандар үкімге шағым түсірді.