Алты жыл тергеуде болған Қарағанды әкімінің орынбасары кінәсіз деп танылды
Алты жыл сотқа дейінгі тергеу мен сот таластарынан кейін Қарағанды облысының экономикалық тергеу департаменті бұрынғы шенеунікке қатысты қылмыстық істі тоқтатты, деп хабарлайды корреспондент Tengrinews.kz.
Жақсылық Шалабековке қатысты қылмыстық іс 2019 жылы қозғалды. Бастапқыда ол Қарағандының оңтүстік-батыс ауданында екі көпқабатты үй салуға бөлінген 120 миллион теңгені жымқырды деп айыпталған. Тергеу мәліметтері бойынша, құрылыс бөлімінің бастығы қызметін атқарып, ол іс жүзінде жұмыс жүргізілмейтінін біле отырып, құрылыс компаниясына аванс төлеу туралы қосымша келісімге қол қойған. Кейінірек айыптау «лауазымдық өкілеттіктерді теріс пайдалану» деп қайта жіктеліп, Шалабеков бірнеше рет қамауға алынып, босатылды.
Жалпы алғанда, ол бір жарым жыл қамауда болды. Тергеу органдары Жақсылық Шалабековтің кінәсін дәлелдеген жоқ. Жақында Қарағанды облысының экономикалық тергеу департаменті қылмыстық істерді тоқтату туралы қаулы шығарды.
«Басқа компаниялармен де осындай қосымша келісімдер жасалды, шарттар бойынша ақшалай қаражат бюджетте көзделді және бюджет комиссиясы мен мәслихат мақұлдады. Заңнаманы бұзушылықтар анықталған жоқ», – делінген Экономикалық тергеу департаментінің қаулысында.
Сонымен қатар, экономикалық тергеу органы бұрын сайланған барлық бұлтартпау және қамауға алу шараларының күшін жойды, сондай-ақ, Шалабеков пен басқа да айыпталушыларға бұзылған құқықтарды қалпына келтіру және ықтимал зиянды өтеу құқығын мойындады. Шалабековтың өзі өткен алты жылды өзі және оның отбасы үшін өте қиын кезең деп сипаттады.
Естеріңізге сала кетейік, бұған дейін 2021 жылы Қазыбек би аудандық соты Жақсылық Шалабековті лауазымдық өкілеттіктерін асыра пайдаланғаны үшін кінәлі деп танып, бір жарым жылға бас бостандығынан айыруға үкім шығарған болатын. 2021 жылдың қыркүйегінде Қарағанды облыстық соты үкімді өзгеріссіз қалдырды. Кейінірек Жоғарғы Соттың қылмыстық істер жөніндегі сот алқасы аудандық соттың үкімі мен облыстық соттың қаулысының күшін жойды. Істі қайта қарауға жіберді.
