187 мың адам тест тапсырады: қаңтар айындағы ҰБТ басталды

10 қаңтардан осы айда өтетін Ұлттық бірыңғай тестілеу (ҰБТ) басталды. Ол 10 ақпанға дейін жалғасады. Биыл шамамен 187 мың адам тестілеуге қатысуға өтініш берген, бұл өткен жылмен салыстырғанда 20 мыңға көп. Бұл туралы Ғылым және жоғары білім министрлігі хабарлады.

Мектеп бітірушілердің 75,2%-ы тестті қазақ тілінде, 24,6%-ы орыс тілінде, ал 189 адам ағылшын тілінде тапсырады.

Талапкерлер тестілеу күні мен уақытын, сондай-ақ емтихан пунктін өздері таңдаған. Ең көп таңдалған пәндер комбинациясы – Математика-Физика (19,2%), бұл бағытқа болашақ мұғалімдер, инженерлер, энергетиктер, құрылысшылар дайындалады. Биология-Химия комбинациясын 16,9% таңдаса, 9,7%-ы шығармашылық бағыт бойынша тест тапсырады.

ҰБТ кезінде калькулятор, Менделеев кестесі мен тұздардың ерігіштік кестесін қолдануға болады. Тестілеуден кейін 30 минут ішінде апелляцияға өтініш беруге болады. Апелляциядан кейін сертификат талапкердің жеке кабинетінде шығады.

2026 жылы ҰБТ форматы өзгермейді: талапкерлер үш міндетті пән мен таңдаған екі бейіндік пәнді тапсырады. Жалпы тапсырма саны – 120. Соның ішінде Қазақстан тарихы – 20 тапсырма, Оқу сауаттылығы мен Математикалық сауаттылықтан – 10 тапсырма, әр бейіндік пән – 40 тапсырма. Ең жоғары балл – 140.

Тестілеу уақыты – 4 сағат (240 минут). Арнайы қажеттіліктері бар балаларға қосымша 40 минут беріледі.

Қаңтардағы ҰБТ-ға ақылы негізде күндізгі оқу нысаны бойынша жоғары оқу орындарына түсуге өтініш бергендер, шығармашылық ББТ-дан басқа дайындық бағыттарына немесе педагогикалық бағытқа ауысқысы келетіндер, өткен жылғы мектеп және колледж түлектері, шетелде білім алған ҚР азаматтары, сондай-ақ ақылы негізде оқуға түсетін мектеп бітірушілер қатысады.

Қаңтардағы ҰБТ-ға қатысу үшін өтініш 2025 жылдың 22-30 желтоқсан күндері қабылданған.