Мемлекеттік нөмірі көрінбейтін көлік жүргізушілеріне қанша айыппұл салынады
Елде мемлекеттік нөмірі көрінбейтін көлік жүргізушілеріне айыппұл салынады. Кей жағдайда қамауға алу немесе көлік жүргізу құқығынан айыру секілді шара да қолданылуы мүмкін. Бұл туралы «ҚазАвтоЖол» хабарлады.
«Мемлекеттік нөмір белгісі – көліктің міндетті сәйкестендіру дерегі. Нөмір белгісі ұлттық стандарт талаптарына сәйкес орнатылып, тәуліктің кез келген уақытында анық көрініп, еркін оқылуға тиіс. Жүргізуші көлігін нөмірі көрінетіндей етіп тазалауға міндетті», – делінген ақпаратта.
Нөмірді әдейі жасыру үшін пленка секілді заттарды қолданғандар, жалған нөмір орнатқандар да жауапқа тартылады.
Әкімшілік құқық бұзушылық туралы кодекстің 590-бабында мынандай жауапкершілік қарастырылған:
- мемлекеттік нөмірі оқылмайтын немесе белгіленген жерге орнатылмаған нөмір үшін 5 АЕК (21 625 тг) айыппұл;
- мемлекеттік нөмір белгісі жоқ көлікті жүргізу – 10 АЕК (43 250 теңге);
- бұл әрекетті бір жыл ішінде қайталаса 20 АЕК (86 500 тг) айыппұл салынады немесе бір жылға көлік басқару құқығынан айырылады (сот шешімі қажет);
- қолдан жасалған нөмірді ілу – 15 АЕК (64 875 тг);
- қолдан жасалған нөмірді ілу, нөмірді көруге кедергі келтіретін материалды пайдалану 5 тәулікке дейін әкімшілік қамаққа алуға және бір жылға көлік басқару құқығынан айыруға әкеледі.
Айта кетейік, 2026 жылы айлық есептік көрсеткіш 4 325 теңгеге тең.
