Қазақстанның 2025 жылғы жалпы ішкі өнім өсімі 6,5% болды

2025 жылғы қаңтар-желтоқсан айларында Қазақстанның жалпы ішкі өнімінің өсімі 6,5% болды. Үкімет Ұлттық статистика бюросының алдын ала деректерін жариялады.

Экономиканың басты көрсеткіштері

Ресми мәлімет бойынша, былтыр экономикалық өсімге негізгі үлесті көлік, құрылыс және сауда салалары қосты.

Өнеркәсіп өндірісінің индексі жыл қорытындысы бойынша 7,4% болды. Өңдеу секторы 6,4% деңгейінде тұрақты өсімді көрсетіп отыр. Азық-түлік өндірісі 8,1%-ға, өңделген мұнай өнімдерін өңдеу 5,9%-ға, химия өнеркәсібі 9,8%-ға, металлургия 1,2%-ға, машина жасау 12,9%-ға ұлғайды.

Ақтөбе, Алматы, Атырау, Батыс Қазақстан, Жамбыл, Жетісу, Қарағанды, Қостанай, Маңғыстау, Павлодар, Солтүстік Қазақстан, Ұлытау, Түркістан облыстарында, Астана, Алматы және Шымкент қалаларының өсімі жоғары.

Көлік және қоймалау саласындағы өсім 20,4% болды. Ол негізінен жүк тасымалы көлемінің, ең алдымен автомобиль және теміржол көлігі арқылы тасымалдаудың ұлғаюына, сондай-ақ бірқатар өңірде жолаушылар тасымалының артуына байланысты.

Құрылыс саласында өсім 15,9%-ды құрады, бұл 2025 жылғы қаңтар–қараша (14,7%) көрсеткішінен жоғары. Өсім жайлы мектептер, медициналық нысандар, көлік және инженерлік инфрақұрылымдар салуды қоса алғанда, инфрақұрылымдық және әлеуметтік жобаларды жүзеге асырумен қамтамасыз етілген. 2025 жылғы қаңтар-желтоқсанда пайдалануға берілген тұрғын үйдің жалпы ауданы 20,1 млн шаршы метрді құрады, бұл 2024 жылғы деңгейден 5,1%-ға жоғары.

Сауда артты

2025 жылы сауда саласы дамыды: қаңтар-желтоқсан айларында өсім 8,9% болды. Негізгі үлес көтерме саудаға тиесілі. Астық, тұқым және мал азығын сататын кәсіпорындар – 2,6 есе, машиналар мен жабдықтар – 99,8%, фармацевтикалық тауарлар – 44,1%, автомобильдер мен жеңіл автокөлік құралдары – 33%, сүт өнімдері, жұмыртқа мен майлар – 25,8%, қант, шоколад және қантты кондитерлік өнімдер – 21,2%, кең ассортименттегі тауарлар – 12,5%.

Ауыл, орман және балық шаруашылығындағы көрсеткіштер 5,9% болды. Ақпарат және байланыс саласында өсім – 3,6%.

Үкімет 2025 жылы экономика тұрақты дамыды деп бағалайды.

Қазақстан экономикасы әлемнің қанша елінен үлкен екенін білгіңіз келсе, Kursiv.Media материалын оқыңыз.