Астана қаласында биік тұрғын үй өртеніп, тоғыз бала құтқарылды

Астана қаласының Сарыарқа ауданындағы Кубрин көшесінде орналасқан он екі қабатты тұрғын үйде өрт шықты. Төтенше жағдайлар министрлігі 23 адам эвакуацияланғаны туралы мәлімет таратты.

Министрліктің мәліметінше, биік ғимараттың бірінші қабаттағы пәтерлерінің бірінде жиһаз жанған. Өрт сөндірушілер тұрғындарды тез арада эвакуациялауға кірісті.

«Құтқарушылар күшімен баспалдақ арқылы 23 адам, оның ішінде тоғыз бала эвакуацияланды», – деп таратты «112».

Тілсіз жау 25 шаршы метрге жайылып үлгерді. Өрт сөндірушілер жалынды сөндірді.

Төтенше оқиғадан ешкім зардап шекпеді. Қазір өрттің шығу себебі анықталып жатыр.

Естеріңізге сала кетейік, бір күн бұрын ғана Астанада көпқабатты тұрғын үй өртеніп, құтқарушылар үш баланы аман алып шыққан.