Тоқаев: Қазақстандағы ЖЭО және электр станциялардың құрылысын жеделдету қажет

Президент Қасым-Жомарт Тоқаев елдегі электр станцияларын жылдам салу және көмірмен жұмыс істейтін электр станцияларын ұлттық жобаға айналдыруды тапсырды. Бұл туралы ол Ұлттық құрылтайдың бесінші отырысында айтты.

«Көмір, электр станцияларына ұлттық жоба мәртебесін беру қажет. Үкіметке бұл мәселені 20 наурызға дейін шешу тапсырылады. Алдыңғы қатардағы міндет – Көкшетау, Семей және Өскеменде жаңа ЖЭО құрылыстарын жедел жүзеге асыру. Бұл жобалардың іске қосылуы кешеуілдеп кетті, халық күтіп отыр. Менің талаптарым үкіметке және «Самұрық-Қазына» қорына бағытталған», – деді Президент.

Сонымен қатар, Тоқаев Курчатовтағы электростанцияны уақытылы іске қосу, ГРЭС-2-ге қосымша энергия блоктарын енгізу және Екібастұздағы ГРЭС-3 құрылысын бастау қажеттігін атап өтті. Энергожүйенің тұрақтылығын арттыру үшін газ генерациясы арқылы өндірілетін қуаттарды жедел түрде іске қосу қажет екенін де ескертті.

Президент ЖЭО құрылыстарын жеделдетуді ерекше атап өтті, себебі атом электр станциясының іске қосылуы әлі алыс.

Сонымен қатар мемлекет басшысы «QazaqGaz» компаниясының әлеуеті дұрыс пайдаланылмай отырғанын атап өтті.