2026 жылы Toyota, Hyundai, BMW, Chevrolet сияқты ірі әлемдік брендтер бірден бірнеше жаңа электромобиль моделін нарыққа шығармақшы. Caranddriver мәліметінше, кейбірі ресми түрде расталса, енді бірі әзірге алдағы жоспардың еншісінде тұр. Дәл осы модельдер 2026-2027 жылдары электромобиль нарығының даму бағытын айқындайды, оның ішінде Қазақстан үшін де маңызды болады.
Toyota bZ4X жаңартылды
Toyota bZ4X электр кроссовері елеулі жаңартудан өтті. Модельдің динамикасы мен энергия тиімділігі жақсартылып, қозғалтқышы жетілдірілді әрі қосымша опциялар кеңейтілді. Бұл өзгерістер bZ4X-ті күнделікті қолдануға арналған электромобильдер сегментінде бәсекеге қабілетті ете түсті.
Subaru Uncharted – жаңа ықшам электромобиль
Ал жапондық өндіруші 2026 жылғы Subaru Uncharted моделін таныстырды. Бұл – толық жетекті нұсқасы бар, ықшамды электрлі кроссовер. Автокөліктің қуаты 338 ат күшін, ал жүріс қоры АҚШ циклі бойынша шамамен 480 шақырымды құрайды.
Модель фирмалық аспасымен жабдықталған және жеңіл жолсыз жерлерге бейімделу әлеуетіне ие, бұл электромобильдер арасында сирек кездесетін ерекшелік.
Сарапшылар бұл жаңалықты бренд үшін маңызды қадам деп бағалап отыр. Себебі Subaru бұған дейін негізінен дәстүрлі толық жетекті автокөліктерімен танымал болған.
Honda 0 Series – седан мен SUV
Honda 2026 жылы өзінің 0 Series бренді аясында электромобильдер платформасын дамытуды жалғастырады. Мынадай модельдер шығады деген жоспар бар:
- Honda 0 SUV – ықшам электрлік SUV, жүріс қоры шамамен 480 км, тез қуаттау мүмкіндігі бар;
- Honda 0 Saloon – стильді электрлік седан, премиум сегменттегі EV-мен бәсекелесуге бағытталған.
BMW iX3 және Баварияның өзге электромобильдері
BMW де батареялық желісін кеңейтуді жоспарлап отыр:
- 2026 BMW iX3 – танымал X3 моделінің электрлік нұсқасы. Қуаты шамамен 463 ат күші, жүріс қоры 640 км, зарядтау қуаты 400 кВт дейін. Сату 2026 жылдың жазында басталуға тиіс.
- BMW i3 және iM3 (седан және «жылдам» нұсқасы) толық электрлік моделдері 2027 жылға жақын нарыққа шығуы күтілуде.
Audi-дың спорттық электр көліктері
Audi 2027 жылға дейін жаңа TT EV моделін дайындап жатыр. Бұл – спорттық электромобиль, дәстүрлі TT мен R8 арасындағы модель. Аталмыш көлік жылдам, EV стилін іздегендер үшін тартымды болмақ, дегенмен Porsche деңгейіндегі суперкар емес.
Kia және Hyundai / Genesis
Kia да электромобильдер желісін кеңейтуді жалғастырады, ал Hyundai Motor Group аясында жаңа модельдер пайда болады:
- Genesis GV60 Magma – қуаты 600 ат күшінен асады, премиум электросубкомпакт, спорттық сипатқа ие;
- Genesis GV90 – ірі электрлік SUV, қуаты шамамен 500 ат күші болады.
Chevrolet Bolt қайта оралады
Chevrolet 2026 жылы жаңа Bolt моделін сатуға шығаруға дайындалып жатыр. Автокөлік жетілдірілген электр қозғалтқыш, LFP батареясы және шамамен 410 км жүріс қоры алады. Сонымен қатар электромобиль жаппай сатып алушылар үшін қолжетімді болып қалуы тиіс.
Lexus және алдағы жоспары
Toyota-ның премиум суббренді Lexus өкілдері Lexus LFA EV моделін жоспарлап отырғанын айтты. Жоғары өнімді электрлік спорткар тек 2029 жылға дейін шығарылады. Ал одан бұрын автосалондарда Lexus TZ электрокроссовері мен Lexus ES EV батареялық седаны пайда болады. Бұл Toyota-Lexus компаниясының электромобильдер болашағына деген маңызды көзқарасын көрсетеді.
Басқа брендтер жайлы
Жақын арада қытайлық, америкалық, еуропалық және ресейлік өндірушілер жаңа модельдерін таныстырады. Ferrari, Bentley, Jaguar, Rolls-Royce сияқты премиум брендтер электрокроссоверлерін шығарады, ал «халықтық» маркалар EV және гибридтік модельдер желісін кеңейтеді.
