Трамп Украинаға кедендік бажсыз еркін сауда аймағын ұсынды

Соғыс аяқталғаннан кейін Украина АҚШ-пен кедендік бажсыз еркін сауда аймағын ала алады, бұл елдің қалпына келуіне ықпал етпек. Бұл туралы Давоста өткен Украиналық таңғы ас барысында АҚШ президентінің арнайы өкілі Стив Уиткофф мәлімдеді.

«Президент Украина үшін кедендік баждардан босатылған аймақ құру туралы айтқан болатын, бұл жағдайды түбегейлі өзгертеді», – деді Уиткофф.

Оның пікірінше, мұндай модельді енгізу кедендік кедергілердің болмауына байланысты украиналық бизнеске АҚШ нарығында айқын бәсекелестік артықшылық береді.

Уиткофф бұл идея іске асқан жағдайда өнеркәсіптік кәсіпорындар Украинаға көшірілуі мүмкін деп болжады.

«АҚШ-қа тауар жеткізгенде кедендік баж төлемей, бәсекелестерден озып шығуға болар еді», – деп түсіндірді ол.

Уиткоффтың бұл мәлімдемелері оның Ресейге сапары қарсаңында айтылды. Бұл сапар барысында Трамп әкімшілігінің өкілдері Украина мен Ресей арасында жасалуы мүмкін бейбіт жоспардың әртүрлі нұсқаларын пысықтамақ.

АҚШ президентінің арнайы өкілі қазіргі таңда бейбітшілік процесі оң бағытта жүріп жатыр деп санайды.

Украинаны өркендеу туралы жол картасы

Бұған дейін УНИАН агенттігі украиналық және америкалық мамандар елді қалпына келтіру мен экономикалық дамуға арналған «Украинаның өркендеу жол картасы» атты құжат әзірлегенін хабарлаған болатын. Бұл құжат инвестициялар жөніндегі келісім мен болашақтағы қалпына келтірудің негізгі аспектілерін қамтиды.

Аталған жол картасы аясында тараптардың соғыстан зардап шеккен аумақтарды қалпына келтіру бойынша бірлескен іс-қимылдары жоспарланған. Әсіресе қалаларды қайта жаңғырту және жаңарту мәселесіне басымдық берілмек.

Кейінірек Украина мен АҚШ соғыстан кейінгі қалпына келтіру және экономикалық қауіпсіздікке бағытталған кең ауқымды пакеттің бір бөлігі ретінде еркін сауда туралы келісім жасасу мүмкіндігін талқылап жатқаны хабарланды. Бұл келісім АҚШ-пен саудада нөлдік кедендік баждарды көздеуі мүмкін және Украинаның жекелеген өнеркәсібі дамыған өңірлерін қамтуы ықтимал.

2025 жылдың соңында Украина президенті Владимир Зеленский Трамппен елдің қауіпсіздік кепілдігі бойынша кездесудің нәтижелері туралы айтты. Тараптар болашақ бейбітшілік келісімінің шарттарының шамамен 95% келісті.