2026 жылы Қазақстанға тағы шетелдік әншілер келеді. Kazakh Tourism мәліметінше, Timbaland, Николь Шерзингер, Busta Rhymes сынды әлемдік деңгейдегі өнер жұлдыздарының концертін өткізу жоспарланған.
Жалпы барлық өңірін қамтитын 55 негізгі іс-шара өткізу жоспарланып отыр. Kazakh Tourism компанияның басқарма төрағасы Талғат Ғазизовтың айтуынша, қазіргі таңда ТМД, Еуропа және Азиядағы 18 ірі онлайн-платформада Қазақстан бойынша 1100-ден астам туристік тур ұсынылған. Бұл көрсеткіш 2023 жылмен салыстырғанда үш есеге артқан.
Оның айтуынша, Қазақстанның халықаралық деңгейдегі туристік имиджін ілгерілету мақсатында бірқатар жұмыстар атқарылған:
- Euronews Travel, Amazon Prime Video, «Бірінші арна» және Францияның M6 телеарнасында Қазақстан туралы халықаралық тревел-жобалар жүзеге асырылып, негізгі мақсатты нарықтар қамтылды;
- Қытайдың Weibo, WeChat, Rednote әлеуметтік желілерінде, сондай-ақ жетекші жаһандық цифрлық платформаларда Қазақстанның тұрақты түрде ілгерілуі қамтамасыз етілуде;
- 2025 жылы Қазақстан 14 халықаралық туристік көрмеде таныстырылды.
Талғат Ғазизов атап өткендей, 2026 жылы 12 халықаралық туристік көрмеге қатысу, сондай-ақ Қазақстан аумағында мәдени, этномәдени, спорттық, экологиялық және гастрономиялық іс-шаралар өткізу жоспарланып отыр.
«2026 жылы әлемдік жұлдыздардың қатысуымен ірі концерттік іс-шаралар өткізу жоспарлануда. Олардың қатарында Timbaland, Николь Шерзингер, Busta Rhymes және басқа да танымал орындаушылар бар деді», – Талғат Ғазизов.
Бұдан бөлек, Азия мен Таяу Шығыстағы мақсатты қалаларда 10 роуд-шоу ұйымдастыру көзделген. Олардың қатарына Мумбаи, Дубай, Шанхай, Сеул, Токио және Сингапур қалалары кіреді.
