Қызылорда облысында шекара қызметінің қызметкерлері жол апатына ұшырады

2 ақпан күні республикалық маңызы бар «Қарабұтақ-Қызылорда-Шымкент» тас жолында орын алған қайғылы оқиға салдарынан бір адам қаза тапты, деп хабарлады Қызылорда полициясы. Жол-көлік оқиғасына Шекара қызметінің өкілдері қатысты болғаны анықталған.

Сағат 13:20 шамасында «Қарабұтақ-Қызылорда-Шымкент» тас жолының бойында екі автокөліктің соқтығысуы тіркелді. Апат салдарынан Шекара қызметінің қызметкерлері зардап шеккен. Өкінішке орай, екінші AUDI көлігінде болған азаматтардың бірі оқиға орнында көз жұмған.

Қазіргі уақытта полиция департаменті «адам өліміне әкеп соққан» жол ережелерін бұзу дерегі бойынша тергеу амалдары бастады. Оқиғаның себептерін анықтау үшін барлық қажетті сараптамалар тағайындалған. Тергеу қорытындысы бойынша тиісті процессуалдық шешім қабылдануы тиіс.

Бұған қоса, тәртіп сақшылары жүргізушілерді жолда, әсіресе қалааралық трассаларда барынша сақ болуға шақырды. Жылдамдық режимін сақтау және жол ережесіне бағыну – қайғылы жағдайлардың алдын алудың басты шарты.