2026 жылғы қысқы Олимпиада ұйымдастырушылары билеттерге акция жариялады
Milano Cortina 2026 Олимпиадасының ұйымдастырушылары ашылу салтанаты билеттеріне арнайы акция жариялады. Ұсыныс жастар аудиториясына бағытталған және 26 & UNDER науқаны аясында жүзеге асырылады.
Акция шарттарына сәйкес, 26 жасқа дейінгі (қоса алғанда) көрермендер ашылу салтанатына бір билет бағасына екі билет сатып ала алады. Ұйымдастыру комитетінің айтуынша, бұл акция символдық маңызы бар датаға орай ұйымдастырылып, тарихи спорттық оқиғаны жастар үшін барынша қолжетімді етуге бағытталған.
Неге 6 ақпанда
Дәл 6 ақпанда Milano Cortina 2026 Олимпиада ойындарының ашылу салтанаты өтеді. Бұл салтанат алдағы онжылдықтағы ең ірі спорттық оқиғалардың басталуын білдіреді. Ұйымдастырушылар әлемнің түкпір-түкпірінен жанкүйерлердің жоғары қызығушылығын күтуде. Ресми хабарламада ашылу салтанатын өзің барып көргендегі әсерге ештеңе жетпейтіні туралы айтылған. Сондай-ақ Олимпиаданың ашылу рәсіміне қатысу адам өмірінде тарихтың бір бөлігіне айналатын ерекше сәт деп сипатталады.
Акция шарттары
26 & UNDER акциясы тек жас мөлшері шектеулі аудиторияға арналған және тек ашылу салтанатына арналған билеттерге қолданылады. Ұйымдастырушылар билеттерді сатып алмас бұрын Олимпиаданың ресми ресурстарынан сатып алу шарттары мен билеттердің қолжетімділігін алдын ала тексеруге кеңес береді.
Айта кетейік, Италияның Милан және Кортина-д’Ампеццо қалаларында өтетін Қысқы Олимпиада ойындарына қатысатын Қазақстан құрамасының жарыс күнтізбесі жарияланды. Туризм және спорт министрлігінің мәліметінше, Қазақстан атына 36 спортшы бірнеше спорт түрінен медаль үшін бақ сынайды.
