Маңғыстау облысында полиция азаматтарды заңсыз қудалау, яғни сталкинг деректері бойынша бірнеше жағдайды тексеріп жатыр.
Lada.kz хабарлауынша, жыл басынан бері «жоқ» деген жауапты қабылдамай, бұрынғы танысын қудалаған екі адамға қатысты қылмыстық іс қозғалған. Құқық қорғау органдарына мазалаған ер адамдарға қатысты екі әйел шағым түсірген.
Бірінші оқиға
13 қаңтар күні 39 жастағы әйел облыстық полиция департаментіне «Е-өтініш» ақпараттық жүйесі арқылы арызданған. Ол бұрын қарым-қатынаста болған азаматты жауапкершілікке тартуды сұраған.
Жәбірленушінің айтуынша, олар 2022 жылдың желтоқсанынан бері кездесіп жүрген. Ал 2025 жылы қарым-қатынасты тоқтатқан. Алайда ер адам мұнымен келіспей, кездесуге мәжбүрлеп шақырып, аңдуға көшкен.
Осы дерек бойынша Мұнайлы аудандық полиция бөлімінде ҚР Қылмыстық кодексі аясында заңсыз қудалау фактісі бойынша қылмыстық іс тіркелді.
Тергеу барысында жәбірленуші бұған дейін де полицияға жүгінгені анықталды. 2025 жылдың сәуірінде күдікті ұсақ бұзақылық жасағаны үшін әкімшілік жауапкершілікке тартылып, айыппұл төлеген. Ал мамыр айында тұрмыстық қатынастар саласындағы құқықбұзушылық үшін 15 тәулікке қамауға алынған.
Соған қарамастан ер адам бұрынғы танысын қудалауын тоқтатпаған.
Екінші оқиға
Осындай тағы бір жағдай Ақтау қаласында тіркелген.
3 ақпанда облыс орталығының тұрғыны полицияға жүгініп, бұрынғы танысы 2024 жылдың қазан айынан бері түрлі нөмірлерден қоңырау шалып, байланыс орнатуға тырысқанын айтқан. Әйелдің сөзінше, күдікті әртүрлі нөмірлер арқылы шамамен 300 рет қоңырау шалған.
Бұдан бөлек, ер адам оның үйіне, жұмыс орнына және демалыс орындарына барып, жәбірленушінің өмірін қиындатқан.
Полиция бұл дерек бойынша да қылмыстық іс қозғады. Күдіктіге бұған дейін бірнеше рет ескерту жасалып, қорғау нұсқамасы берілген әрі ол профилактикалық есепке алынған. Алайда ол талаптарды орындамай, қудалауын жалғастырған.
Сондықтан қорғау нұсқамасын бұзғаны үшін әкімшілік хаттама толтырылып, азамат уақытша ұстау изоляторына қамалды.
Айта кетейік, сталкинг үшін қылмыстық жауапкершілік Қазақстанда 2025 жылдың шілдесінде енгізілген.
