Жапаров Конституциялық сотқа өз өкілеттігінің мерзімін нақтылау үшін жүгінді
Қырғызстан президенті Садыр Жапаров президенттік сайлауға қатысты түсініктеме алу үшін елдің Конституциялық сотына жүгінді.
«Өтініш беру қажеттілігі қоғамдық-саяси кеңістікте және сараптамалық ортада қарқынды қоғамдық пікірталастар нәтижесінде Қырғыз Республикасының қазіргі Президентінің өкілеттіктерін жүзеге асыру мерзімдерін, сондай-ақ кезекті не мерзімінен бұрын президенттік сайлауды тағайындау тәртібін реттейтін конституциялық ережелер туралы түбегейлі қарама-қарсы түсінік қалыптасқандығына байланысты», – деп хабарлады Қырғызстанның Конституциялық соты.
Президенттің ұсынысында 2021 жылы референдум қабылдаған «Қырғыз Республикасының Конституциясы туралы» Заңның ережелері, бірқатар сарапшылардың пікірінше, 2010 жылғы 27 маусымдағы редакцияда ел Конституциясына сәйкес сайланған президенттің өкілеттік мерзімінің басталу сәті мен ұзақтығын екіұшты түсіндіруге мүмкіндік береді.
«Заңгерлер және қоғам қайраткерлері айтқан қарама-қарсы құқықтық ұстанымдар қоғамдық билік институттарының тұрақты және заңды жұмыс істеуі үшін маңызы бар мәселелер бойынша конституциялық-құқықтық күмән туындағанын көрсетеді», – делінген Конституциялық соттың сайтында.
Конституциялық сот 17 ақпанда президенттің өтінішін қарайды.
Осыған дейін Қырғызстан президенті Садыр Жапаров 2020 жылдың қазан айынан бері қызмет етіп жүрген Қамшыбек Тәшиевті министрлер Кабинеті Төрағасының орынбасары және төрағасы қызметінен босатқан еді.
