Миллионер Сәрсеновтің ұлына тиесілі зауыт банкроттық алдында тұр

Маңғыстаудағы шыны-пластик құбыр өндіретін кәсіпорнында жаппай қысқарту жүріп жатыр. Lada басылымының жазуынша, шамамен 80 жұмысшыға қысқарту туралы хабарлама берілген. Бұл – зауыт ұжымының жартысына жуығы.

Көпшілігі бұл жерде 20 жылдан астам еңбек еткен тәжірибелі мамандар.

Жұмысшылардың жағдайы

Соңғы жеті ай бойы зауытта тұрақты өндіріс болмаған. Қызметкерлер іс жүзінде бос жүріп, жалақының жартысын ғана алып келген. Енді олар толықтай жұмыстан айырылып қалуы мүмкін.

Жұмысшылардың айтуынша, ұжымның басым бөлігі – жергілікті тұрғындар. Олардың отбасы, бала-шағасы, несиесі бар.

Сондықтан олар зауытты қайтадан бұрынғы мемлекеттік компанияның құрамына қайтаруды немесе тұрақты тапсырыспен қамтамасыз етуді сұрап отыр.

Неліктен зауыт дағдарысқа ұшырады

Кәсіпорын басшылығы зауыттың қаржылық жағдайы өте ауыр екенін растады. Сегіз ай бойы тапсырыс болмағандықтан, шығын көбейіп, банкроттық қаупі туындаған.

Басты себептердің бірі – нарықтағы бәсекенің күшеюі. Алматыда жаңа, заманауи технологиямен жабдықталған ұқсас зауыт ашылған.

Ондағы өндіріс құны арзан, сондықтан тендерде жеңіп кетеді. Ал Маңғыстаудағы зауыттың жабдығы ескірген, өнімнің өзіндік құны жоғары. Соның салдарынан кәсіпорын нарықтағы бәсекеге төтеп бере алмай отыр.

Бұдан он жыл бұрын жағдай мүлде басқа болған. 2015 жылы зауыт мұнай саласына құбыр мен фитинг жеткізетін негізгі кәсіпорындардың бірі саналды. 2017 жылы үшінші цех іске қосылып, өндірісті кеңейту жоспарланған.

Алайда 2020 жылдан бастап тапсырыс азайып, өндіріс құлдырай бастаған. Соның нәтижесінде зауыт бүгінгі күні шығынды азайту үшін қызметкерлер санын қысқартуға мәжбүр.

Компания мен еңбек инспекциясының ұстанымы

Облыс әкімдігінде өткен кездесуде нақты шешім қабылданбаған. Жұмыстан босатылатын қызметкерлерге жұмыспен қамту орталығына тіркелу ұсынылған.

Еңбек инспекциясының мәліметінше, зауыт сегіз айдан бері жұмыссыз тұр. Ал қысқарту бойынша ресми шағым түспеген.

Қазір мәселе бақылауда, жақын уақытта кәсіпорын құрылтайшысымен кездесу жоспарланып отыр.

Кәсіпорын кімге тиесілі

Зауыт жеке компанияға тиесілі. Оның иесі – кәсіпкер Абай Сәрсенов.

Ол – қазақстандық ірі кәсіпкерлердің бірі Рашит Сәрсеновтің ұлы. Сәрсеновтер әулетінің активтері қатарында банк пен жанармай құю стансалары желісі бар.

Жұмысшыларға қандай өтемақы беріледі

Кәсіпорын басшылығы қысқарту заң талаптарына сай жүргізілетінін мәлімдеді. Әлеуметтік осал топтарға жұмыс орнын сақтап қалу басымдығы қаралады. Сонымен қатар қысқартылатын қызметкерлерге бір реттік қосымша материалдық көмек ретінде лауазымдық жалақысының 50 пайызы көлемінде төлем жасау жөнінде келісім бар.