Наурыз мерекесіне орай қосымша 35 мың пойыз билеті сатылады

Наурыз мейрамы қарсаңында Қазақстанда қосымша үш пойыз іске қосылады. Осыған орай мереке күндері қосымша 35 мың орын ашылады. Бұл жөнінде Көлік министрлігі мәлімдеді.

«Наурыз мейрамы кезеңінде жолаушылар ағынының артуына байланысты «Жолаушылар тасымалы» АҚ 20 рейске үш қосымша пойыз тағайындайды. Сұранысы жоғары бағыттарда қосымша 230-ға жуық тіркеме вагон енгізеді. Нәтижесінде жолаушыларға 35 мың қосымша орын ұсынылады», – делінген хабарламада.

Қандай бағыттарда қосымша пойыз жүреді

Компания мәліметінше, қосымша рейстер Алматы, Астана, Шымкент және Ақтөбе бағыттарында ұйымдастырылады.

№201/202 «Алматы-2 – Астана-1»
– Алматыдан: 20, 22, 24, 26, 28, 30 наурызда;
– Астанадан: 21, 23, 25, 27, 29, 31 наурызда;
Барлығы – 6 рейс.

№204/203 «Астана Нұрлы жол – Шымкент»
– Астанадан: 19, 20, 22, 23, 25, 26, 28, 29 наурызда;
– Шымкенттен: 21, 22, 24, 25, 27, 28, 30, 31 наурызда;
Барлығы – 8 рейс.

№205/206 «Ақтөбе – Астана Нұрлы жол»
– Ақтөбеден: 19, 21, 23, 25, 27, 29 наурызда;
– Астанадан: 20, 22, 24, 26, 28, 30 наурызда;
Барлығы – 6 рейс.

Теміржол компаниясы бұл шаралар мереке күндері билет тапшылығын азайтуға бағытталғанын атап өтті.

Билеттерді bilet.railways.kz сайтынан және теміржол вокзалдарының кассаларынан сатып алуға болады.