Қазақстанның экс-президенті Нұрсұлтан Назарбаевтың немере інісі Нұрбол Назарбаев сотқа жүгінді. Бұл жолы өзін банкрот деп тануды сұраған. Оның мемлекет алдындағы қарыздарының сомасы 63,7 млрд теңгеден асты. Сот қазірдің өзінде азаматтық іс қозғап, кәсіпкерді 2026 жылдың 3 наурызына жоспарланған кездесуге шақырды, деп хабарлайды Tengrinews.
Нұрбол Назарбаев негізінен екі себеппен тақырға отырды:
- 61,8 млрд теңге – негізгі сома, оның 55 млрд теңгесі арнаулы мемлекеттік қорға түсуге тиіс (ол жерге әдетте заңсыз шығарылған активтерді қайтарудан түскен қаражат жіберіледі).
- 1,6 млрд теңге – бюджет кірісіне мемлекеттік баж.
Бір қызығы, 2025 жылдың мамыр айында Назарбаевтың байлығы 179 миллион долларға бағаланды және ол Forbes нұсқасы бойынша елдегі ең бай кәсіпкерлер тізімінде 57-ші орынды иеленді (2024 жылы 49–орында еді). Енді кәсіпкер шоттар бойынша төлем жасау мүмкін еместігін мәлімдейді.
Нұрбол Назарбаев үшінші рет бұл тақырға отырғанын заңдастыруға тырысып жатыр. 2025 жылдың күзінде ол банкроттық пен төлем қабілеттілігін қалпына келтіру процедурасын екі рет бастауға тырысты, бірақ сот оның өтінішін қараусыз қалдырды немесе алдыңғы шешімдердің күшін жоюдан бас тартты.
Сонымен қатар, кәсіпкер «Алтын Орда» базарының бұрынғы иесі Айдарбек Құсайыновтың талап-арызымен күресуде. Ол Назарбаевтың «негізсіз байығанын» айтып, 15 млрд теңгені қайтаруын талап етті.
Егер бұл жолы сот банкроттықты мақұлдаса, Назарбаевтың активтері (жылжымайтын мүлік, машиналар, Prime Capital Invest және Prime Capital Holding компанияларындағы үлестер) кредиторлармен есеп айырысу үшін сатыла бастайды. Осыдан кейін қарыздың қалдығы есептен шығарылады, бірақ банкрот үшін қатаң шектеулер күшіне енеді:
- 5 жыл ішінде жаңа несие алуға тыйым салу;
- үш жылдық қаржылық мониторинг;
- алдағы 7 жылда қайта банкроттыққа ұшырау мүмкін болмайды.
Бұл ретте сот шешімі бойынша бюджетке төленетін міндетті төлемдер, қылмыстық істер бойынша залал және алимент есептен шығаруға жатпайтынын ескеру маңызды.
2025 жылы Нұрбол Назарбаевқа қатысты банкроттық туралы іс қозғалғанын жазған едік. Ол шамамен 58 млрд теңге қарыз болды.
