Esentai city ісі: Ольга Әбдіғаппарованың 2,5 жылға бас бостандығы шектелді

Алматы қаласы Медеу ауданының № 2 соты кәсіпкер Алмас Әбдіғаппаровтың жары Ольга Әбдіғаппароваға Esentai city тұрғын үй кешенінің үлескерлерін алдау ісі бойынша үкімі шығарды. Ақпаратты Kursiv.Media-5а Алматы қалалық сотының баспасөз қызметі растады.

Әбдіғаппароваға 2,5 жыл бас бостандығын шектеу жазасы тағайындалды. Үкім әлі заңды күшіне енген жоқ.

Esentai city ТК үлескерлерінің айтуынша, Ольга 2022 жылдың соңында алаяқтық жасағаны үшін 7 жылға сотталған жұбайының жобасын басқарған. Ол кешеннің құрылысын қайта бастауға уәде берген. Алайда үлескерлердің айтуынша, іс жүзінде AV-Construction құрылыс компаниясының активтерін сатқан.

Әбдіғаппарова 2025 жылдың ақпан айының басында ұсталды, дегенмен полицияға 2024 жылдың сәуірінен бастап өтініштер келіп түскен.

Айта кетейік, Алматыда Esentai City тұрғын үй кешенін салу 2016 жылы басталды, бірақ әлі аяқталмады.

Алмас Әбдіғаппаров 2021 жылы шілдеде Алматыдағы Esentai City кешеніндегі вилланы сатудан түскен 420 миллион теңгені жымқырды деген күдікпен 2022 жылы ұсталған.