Көкшетауда ер адам 25 мың долларға бүйрегін сатпақ болған

Көкшетауда Алматы облысының тұрғыны 25 мың долларға бүйрегін сатқысы келді деген күдікпен ұсталды, деп хабарлады Ақмола облысы полиция департаментінің баспасөз қызметі.

Құқық қорғау органының мәліметінше, ұйымдасқан қылмысқа қарсы күрес басқармасының қызметкерлері заңсыз мәміленің жолын кескен.

«Қылмыстық іс материалдарына сәйкес, Алматы облысының тұрғыны өз органын әлеуметтік желілерде сату ниетімен хабарландыру жариялады. Полиция ерекше хабарландыруға қызығушылық танытып, арнайы операция өткізді. Нәтижесінде жәбірленуші Көкшетауда қолма-қол ақшаның бір бөлігін алған кезде ұсталды», – деп нақтылады өңірдің ПД баспасөз қызметі.

Полицияның ақпаратына сүйенсек, тексеру барысында күдікті бұрын осындай хабарландырулар жариялаған. Ұсталған кезде одан қолма-қол ақша, ұялы телефон, сондай-ақ, медициналық құжаттар мен талдау нәтижелері тәркіленген.

Қазіргі уақытта іс бойынша қылмыстық іс қозғалды. Тергеу органдары болған оқиғаның барлық мән-жайын анықтайды және қажетті іс жүргізу әрекеттерін жүргізеді.

Айта кетейік, Қазақстанда органдарды сатып алуға және сатуға заңмен тыйым салынған. Сатушы үшін де, делдалдар мен сатып алушылар үшін де қылмыстық жауапкершілік қарастырылған.