Украина президенті Владимир Зеленский алғаш рет резиденция орналасқан бункерді көрсетіп, оның қайда орналасқанын да бүкіл әлемге жария етті. Бункер Киевтегі Тәуелсіздік алаңының астында салынған.
Украин президентінің соғыстың төрт жылдығына арналған бейнеүндеуі әлеуметтік желілерде жарияланды. Зеленский алғаш рет президент кеңсесі орналасқан бункерді бүкіл әлемге көрсетті.
«Бүгін Путиннің Киевке үш күндік шабуыл бастағанына тура төрт жыл толды. Осыдан-ақ Украинаның осы уақытқа дейін қалай қарсылық көрсеткенін түсіне беруге болады», – деп мәлімдеді Зеленский.
Ресей әскері 2022 жылғы 24 ақпанда Украина аумағына басып кірген. Сол кезде Ресей президенті Владимир Путин Киевті үш күнде алуға уәде берген.
«Мына кеңсе Банковая көшесіндегі бункердің ішіндегі шағын бөлмеде орналасқан», – деп мәлімдеді украин президенті.
«Біз өз тәуелсіздігімізді қорғап қалдық. Біз мемлекеттігімізді жоғалтпадық. Путин дегеніне жетпеді. Ол украин халқының сағын сындырмады. Ол соғыста жеңіске жете алмады. Біз Украинаны сақтап қалдық», – деді Зеленский бейнеүндеуінде.
Одан соң украин президенті шағын кеңсесінен шығып, бункердегі ұзын тоннельмен жүріп өтті. Содан кейін баспалдақпен жоғары көтеріліп, Киев орталығындағы Майдан Незалежности, яғни Тәуелсіздік алаңына шықты.
Соғыс басталғалы бері Украина шамамен 10 млн азаматынан айрылған. Олардың арасында майданда қаза тапқандар, елден көшіп кеткендер немесе Ресей басып алған жерлерде тұрып жатқандар бар.
Бүгін, 24 ақпанда Киевке Еурокоммися басшысы Урсула фон дер Ляйен барды. Соғыс басталғалы бері украин астанасына он рет сапарлаған саясаткер Еуропа одағы Украинаға көмектесе беретінін тағы да мәлімдеді.
