Индонезия полициясы Ломбок аралындағы қонақүйге кірген кезде қылмыстық істегі күдікті Сұлтан Сәрсемәлиев қашуға әрекет жасаған. Алайда қашып үлгермей, оқиға орнында ұсталған. Бұл туралы комиссар Рикки Пурнама айтты.
Индонезия полициясы берген мәлімет
Комиссардың сөзінше, күдіктіні ұстауға Индонезиядағы Интерпол Ұлттық орталық бюросының қызметкерлері, Солтүстік Ломбок полициясы және көші-қон қызметі қатысқан.
Полицияның хабарлауынша, ерлі-зайыпты Сұлтан Сәрсемәлиев пен Ақбаян Мұқанғалиева 2025 жылдың 14 желтоқсанында Куала-Лумпурдан (Малайзия) Бали аралына барған. Содан кейін Ломбок аралына көшіп, ұсталғанға дейін сонда тұрған.
Қазір Индонезия тарабы екі күдіктіні Қазақстанға депортациялауға дайындалып жатыр.
Бұған дейін Қазақстанның Ішкі істер министрлігі күдіктілерді ұстаған сәт түсірілген видео жариялады.
Атыраудағы жұмбақ өлім
2025 жылдың 25 желтоқсанында Атырау облысы полициясы іс-түссіз жоғалған бір отбасының 4 адамына іздеу жариялады. Кейінірек полиция олардан бөлек осы отбасының қызы мен күйеу баласы да жоғалғанын мәлімдеді.
Оларды іздеу барысында ерлі-зайыпты Максот Қарабалин мен Нәсіп Өтешқалиеваның сүйегі өздері тұрған үй аумағынан табылды. Істе отбасының күйеу баласы Сұлтан Сәрсемалиев күдікті деп танылған. Ал оның әйелі (жоғалған отбасының кенжесі – ред.) Ақбаян Мұқанғалиеваға хабар-ошарсыз кету дерегі бойынша іздеу жарияланды.
