10 мыңнан астам азамат айына 3 млн теңге табады: олар қайда жұмыс істейді

2025 жылы Қазақстанда 11,8 мың жалдамалы қызметкер айына 3 млн теңгеден астам табыс тапқан. Бұл елдегі жалдамалы қызметкерлердің жалпы санының небәрі 0,4 пайызын құрайды. Мұндай деректерді Ұлттық статистика бюросы келтірді, деп хабарлайды Ranking.kz.

Олар қай салада істейді

3 млн теңгеден жоғары жалақы көбіне қаржы секторында кездеседі. 2025 жылы мұндай табыс табатын әрбір төртінші қызметкер қаржы және сақтандыру қызметі саласында еңбек еткен. Шамамен 2,6 мыңнан астам адамды құрайды.

Екінші орында – тау-кен өндіру өнеркәсібі және карьерлерді игеру. Бұл салада 1,9 мың адам осындай жалақы алған. Тағы 1,3 мың қызметкер (11,3%) өңдеу өнеркәсібінде жұмыс істеген.

3 млн теңгеден жоғары табыс алатындар ең аз тіркелген салалар – мемлекеттік басқару (бар болғаны 10 адам) және коммуналдық сектор (12 адам).

Қай өңірлерде «үш миллионнан» асатын жалақы алатындар көп

3 млн теңгеден жоғары жалақы алатын қызметкерлердің жартысына жуығы Алматы қаласында тұрады. Олардың саны – 5,7 мың адам. Мұнай жобалары шоғырланған Атырау облысында мұндай қызметкерлер саны шамамен 1,8 мың болса, Астанада – 1,3 мың адам.

7 млн теңгеден жоғары жалақы алатындар

Ұлттық статистика бюросының мәліметінше, ең жоғары жалақы деңгейі 3 млн емес, 7 млн теңгеден басталады. 2025 жылы ең жоғары жалақы алған жалдамалы маман – пайдалы қазбаларды өндіру саласындағы тау-кен инженері. Оның айлық табысы 12 млн теңгеден асқан.

Екінші орында – құрылыс ұйымының басшысы. Оның айлық табысы – 11,5 млн теңге. Үшінші орынды көлік және логистика саласындағы компанияның бас директоры иеленген. Оның айлық табысы – 10,4 млн теңге.

Мұндай табыстың басым бөлігін жоғары буындағы басшылар алады. Көбіне бұл – мұнай саласы, тау-кен өндіру және өңдеу өнеркәсібі, сондай-ақ қаржы секторындағы компаниялар.

Сонымен қатар жоғары жалақы алатындардың қатарында басқарушылық лауазымы жоқ мамандар да бар. Әдетте бұлар – senior деңгейіндегі жоғары білікті қызметкерлер.

Мәселен, 2025 жылы бір аудитор айына 7,3 млн теңге алған. Бизнес-консалтинг саласындағы жекелеген мамандар 6 млн теңгеден астам табыс тапқан. Ең қымбат кәсіби мамандар қатарында логистика, қаржы, рекрутинг және маркетинг саласындағы сарапшылар да бар.

Қызметкерлердің басым бөлігі қайда шоғырланған

Жоғары жалақылар болғанымен, жалдамалы қызметкерлердің негізгі бөлігі табыс шкаласының орта және төменгі сегменттерінде орналасқан.

Ең ірі топ – 1 млн адамнан астам қызметкер айына 300 – 500 мың теңгеге дейін жалақы алған. Сан жағынан екінші орында – 200 мыңнан 300 мың теңгеге дейін табыс табатындар (724,1 мың адам). Оларға жақын көрсеткіш – 100 мыңнан 200 мың теңгеге дейін жалақы алатындар (711,8 мың адам).

Дәл 100–200 мың теңге аралығы ең ауқымды санат болды. Барлық қызметкердің 21,3 пайызы осы аралықта табыс тапқан.

Ең төменгі жалақы, яғни 85 мың теңгені 43,8 мың адам алған. Салыстырсақ, айына 1 млн теңгеден жоғары табыс табатын «миллионерлердің» саны 154,7 мың адам болған. Бұл көрсеткіш 3,5 есе көп.

Медианалық диапазон – 300 мыңнан 400 мың теңгеге дейін есептеледі. Ол 613,4 мың қызметкерді (18,4%) қамтыған. Бұл табыстардың орталық шегін көрсетеді: қызметкерлердің жартысы осы сомадан аз, жартысы одан көп табыс алған.

Ал ел бойынша номиналды орташа жалақыға (429,4 мың теңге) жуық табыс іс жүзінде жалдамалы қызметкерлердің тек 12,7%-ына ғана тиесілі болған.