Алматы көшелеріне самокаттар қайта оралды

Күн райы жылынып, көктемнің алғашқы күндері Алматы көшелерінде қайтадан электросамокаттар пайда болды. Қысқы үзілістен кейін кикшеринг сервистері өз жұмысын қайта жандандырып, қала тұрғындары әдеттегі тұрақ нүктелерінен көліктерді көре бастады.

Ауа райы жылығаннан кейін операторлар дәстүрлі түрде самокаттарды қалалық маршруттарға шығарды.

Пайдаланушыларға қойылатын талаптар

Биылғы маусымда қауіпсіздік ережелерін сақтауға ерекше көңіл бөлініп жатыр. Сервисті пайдалану алдында әрбір жүргізуші келесі шарттармен келісуге тиіс:

Жас шектеуі: Пайдаланушының жасы 18-ден асқан болуы міндетті.
Мас күйде айдауға тыйым: Көлікті мас күйінде басқаруға болмайды.
Жеке жүру: Самокат тек бір адамға арналған, оған екі адамның мінуіне рұқсат етілмейді.

Жылдамдық пен қозғалыс тәртібі

Жаяу жүргіншілер мен жүргізушілердің қауіпсіздігі үшін нақты жылдамдық режимдері белгіленген:
Тротуарда: Жылдамдықты сағатына 6 км-ден асырмау керек.
Веложолдарда: Егер арнайы жол болса, сонымен жүру міндетті. Мұндағы максималды жылдамдық 25 км/сағ.
Жолдың жүру бөлігінде: Көлік жүретін жолмен тек оң жақ шетпен, басына шлем киіп және кез келген санаттағы жүргізуші куәлігі болған жағдайда ғана жүруге болады. Сондай-ақ қараңғыда көзге түсетін жарық шағылыстыратын элементтері бар киім кию ұсынылады.

Еске сала кетейік, 2025 жылы Алматы қаласында электр самокаттардың қатысуымен 386 жол-көлік оқиғасы тіркелген, салдарынан 400-ден астам адам жарақат алған еді.