Екібастұз әкімдігі Нығматулинге тиесілі зауыттан миллондаған теңге өндіріп алмақ
Екібастұз қаласы әкімдігінің құрылыс бөлімі «EkibastuzFerroAlloys» компаниясынан бұған дейін бюджеттен бөлінген 31,8 млн теңгені өндіріп алу үшін сотқа жүгінді. Бұл туралы «Курсивке» Екібастұз әкімдігі хабарлады.
«Екібастұз қаласы әкімдігінің құрылыс бөлімі» ММ аудиторлық тексеріс нәтижелері бойынша берілген нұсқаманы орындау аясында, «EkibastuzFerroAlloys» ЖШС-нен бюджет қаражатын өндіріп алу туралы Алматы облысының мамандандырылған ауданаралық экономикалық сотына талап арыз жолдады. Талап қою сомасы 31 803 200 (отыз бір миллион сегіз жүз үш мың екі жүз) теңгені құрайды», – делінген әкімдіктің ресми жауабында.
Мемлекеттік мекеме сотқа жүгінуге аудиторлық тексеру барысында анықталған бюджет қаражатын пайдаланудағы заң бұзушылықтар негіз болғанын нақтылады. Бюджет заңнамасының талаптарына сәйкес, аталған қаражат бюджетке қайтарылуы тиіс.
Бастапқыда Екібастұз әкімдігінің құрылыс бөлімі қаражатты қайтару туралы талап арызды (ол кезде іс материалдарында сома көрсетілмеген) Павлодар облысының мамандандырылған ауданаралық экономикалық сотына берген болатын. Алайда, бұл сот істі Алматы облысының мамандандырылған ауданаралық экономикалық сотына жолдады. Қазіргі уақытта істі қарау жалғасуда.
Құрылыс бөлімінің мәліметінше, «EkibastuzFerroAlloys» ферроқорытпа зауыты 2025 жылдың 10 қыркүйегінде пайдалануға берілген. Кәсіпорынның жобалық қуаттылығы жылына 240 мың тонна жоғары маркалы FeSi75 ферросилицийін өндіруге негізделген. Бұл өнім болат, шойын және алюминий қорытпаларын жасау үшін әлемдік нарықта жоғары сұранысқа ие.
Әкімдік компанияға нақты қанша бюджет қаражаты берілгенін ашып айтқан жоқ: әңгіме инфрақұрылымды ашық ету және басқа да қызметтер туралы болып отыр.
Құны 92 млрд теңгені құрайтын зауыттың іске қосылғаны туралы компанияның өзі 2025 жылдың қарашасында хабарлаған еді.
Кәсіпорын «EkibastuzFerroAlloys» зауытының ашылуы Қазақстанға ферросилиций өндіруден әлемдік үздік үштікке (топ-2) кіруге мүмкіндік беріп, елдің жаһандық металлургия саласындағы позициясын нығайтатынын атап өткен.
Құрылыс кезеңінде кәсіпорын 1,5 мың адамды жұмыспен қамтыса, зауыт іске қосылғаннан кейін онда 800-ге жуық маман еңбек ететін болады.
Компанияның ортақ иесі, кәсіпкер Ерлан Нығматулин (Мәжілістің бұрынғы төрағасы Нұрлан Нығматулиннің ағасы) зауыттың бастан-аяқ жоғары технологиялық және экспортқа бағытталған кәсіпорын ретінде құрылғанын атап өтті.
«Өнім әлемнің 52 еліне жеткізіледі. Сонымен қатар, қазақстандық қамту деңгейі 96%-ды құрайды, бұл локализацияның жоғары екенін және отандық өндірушілерге деген сенімді білдіреді», – деген.
eGov мәліметтеріне сәйкес, Екібастұзда тіркелген «EkibastuzFerroAlloys» компаниясының құрылтайшылары – Ерлан Нығматулин және германиялық «Asterium Holding AG».
Айта кетерлігі, 2024 жылы компания иелері ретінде Ерлан Нығматулин мен Давид Кемертелидзе көрсетілген болатын.
2021 жылы Қазақстанның Даму Банкі (ҚДБ) зауыт құрылысына 72 млрд теңге бөлген – бұл ҚДБ-ның Нұрлан Нығматулиннің туыстарына қатысы бар компанияларға берген ең ірі несиесі.
Мәжілістің бұрынғы спикерінің отбасы мүшелеріне (ұлдары Нұрхан мен Нұржан Нұрлановтар, ағасы Ерлан Нығматулин және қайын атасы Ғаббас Бектұровқа) тиесілі компаниялар алты рет қаржыландыру алған.
Жалпы көлемі 161,9 млрд теңгеге жетті. Олардың қатарында «Қазфосфат», «EkibastuzFerroAlloys», «Asia FerroAlloys», «YDD Corporation» және «Тұрғысын-1» кәсіпорындары бар.
