Forbes тізіміндегі миллионер Алматыдағы курортқа 69 млрд теңге инвестиция салады

Oi-Qaragai курортына иелік ететін компания құны 68,9 млрд теңге болатын кеңейту жобасын жүзеге асыруда. Жобаның инвесторы – компания иесі, Forbes тізіміне енетін бизнесмен Ерлік Балпанбаев.

Жақында үкімет бекіткен Алматыдағы тау кластерін дамытудың кешенді жоспарына енген инвестициялық жобалардың ішіндегі ең қымбаттарының бірі – «Oi-Qaragai – Ақтас» тау курортын кеңейту. Жоспарда жобаның құны 83,2 млрд теңгеге бағаланған.

Сонымен қатар, Алматы облысы әкімдігінің туризм басқармасы Oi-Qaragai-ды кеңейту өңірдегі ең ірі туристік нысандардың бірі екенін хабарлады.

Курорт Талғар ауданындағы Ақтас үстіртінде орналасқан. Ең биік нүктесі AQTAS (теңіз деңгейінен 2,1 мың метр биіктікте) деп аталады. Ол Орталық Азиядағы ұзындығы 28 шақырымдық тау шаңғы трассасы. Қазіргі уақытта 25 трасса жұмыс істейді.

«Қазірдің өзінде «Ақтас» гондолалы аспалы жолы пайдалануға берілді, қонақ үйлер мен мейрамхана құрылысы жүріп жатыр, инженерлік инфрақұрылым тартылуда. Нысан жылына 660 мың туристі қабылдауға қауқарлы және 200-ге жуық жұмыс орнын қамтамасыз етеді», – деп хабарлады әкімдіктегілер.

Жоба толықтай 2028 жылы аяқталуы тиіс. Әкімдік инвестиция көлемін 68,9 млрд теңге деп көрсеткен.

Туризм басқармасы бұл жобаны бизнесмен Ерлік Балпанбаевқа тиесілі Oi-Qaragai компаниясы жүзеге асырып жатқанын атап өтті. Adata мәліметтеріне сәйкес, компанияның төрт құрылтайшысы бар: Балпанбаев, Oi-Qaragai директоры Дмитрий Матяс, Alina Group бас директоры Елена Удовенко және осы компанияның вице-президенті Заур Халафов.

Ерлік Балфанбаев – құрғақ құрылыс қоспалары мен бояу-лак өнімдерін шығаратын Alina компаниялар тобының негізін қалаушы әрі акционері. Forbes оның байлығын 400 млн долларға бағалаған. 2024 жылы ол Alina Group компаниясының 75% үлесін жапондық Nippon Paint Holdings Co. компаниясына сатты.

Айта кетейік, осыған дейін Балпанбаев өзіне тиесілі курортта мұражай ашатынын жазған едік.