Гуманитарлық көмек саясаттан тыс болуы тиіс: Тоқаев Қызыл Крест басшысымен кездесті

Президент Қасым-Жомарт Тоқаев Халықаралық Қызыл Крест комитетінің президенті Мирьяна Споляричті қабылдады. Кездесудің негізгі тақырыбы соғыс пен қақтығыстар жағдайындағы гуманитарлық көмек мәселесі болды.

Не талқыланды

«Халықаралық Қызыл Крест комитеті халықаралық гуманитарлық ынтымақтастық жүйесінде өте маңызды рөл атқарады. Халықаралық құқық нормаларын нығайтуға қосқан үлесіңізді жоғары бағалаймыз. Сіз басқаратын Ұйым мен басқа да халықаралық беделді құрылымдар баршаға ортақ адамзат құндылықтарын насихаттауға елеулі үлес қосып келеді. Әсіресе, бұл іс адамдар көмекке мұқтаж аймақтарда өте маңызды», – деді Президент.

Тоқаев гуманитарлық көмекті саясиландыруға болмайтынын атап өтті. Қазақстан халықаралық гуманитарлық құқықты нығайтуға бағытталған жаһандық қозғалысты бастамашы болған алты елдің қатарына кіреді.

Кездесуде соғыс кезіндегі гуманизм мәселелеріне арналған ірі конференцияға дайындық та талқыланды. Ол биыл жылдың соңында Иорданияда өтеді.

Сполярич Қазақстанға қолдау көрсеткені үшін алғыс айтып, екі тараптың ынтымақтастығы 1990-жылдардан бері жалғасып келе жатқанын еске салды.