Иран президенті көрші елдерге соққы жасауды тоқтататынын мәлімдеді

Иран президенті Масуд Пезешкиан көрші елдерге, егер Иранға шабуыл олардың аумағынан жасалмаса, бұдан былай соққы жасамайтынын мәлімдеді, деп хабарлайды Al Jazeera.

Басылымның мәліметінше, Пезешкиан Иран көшбасшыларының уақытша кеңесі кеше көрші мемлекеттерге соққы беруді тоқтату туралы шешімді мақұлдағанын хабарлаған. Иранға жасалған шабуылдар осы елдердің аумағынан басталған жағдайлар ғана ерекшелік болуы мүмкін.

Президент өз мәлімдемесінде соңғы күндері жасалған соққылар үшін көрші елдерден кешірім сұрады.

Сонымен қатар, Масуд Пезешкиан Америка Құрама Штаттарының Иранның сөзсіз тізе бүгуі (капитуляциясы) туралы талаптарына түсініктеме беріп, оны «олар өздерімен бірге көрге алып кететін арман» деп атады.

Бұл мәлімдемелер аймақтағы жалғасып жатқан соғыс қимылдары аясында айтылды. 2026 жылғы 7 наурызда таңертең ерте ирандық күштер Парсы шығанағындағы араб мемлекеттеріне бірнеше соққы берді, ал Израиль мен АҚШ Ислам Республикасының аумағына әуеден соққы беруді жалғастырды.

AP агенттігінің жазуынша, сенбі күні, 7 наурызда таңертең Бахрейн, Сауд Арабиясы және Біріккен Араб Әмірліктеріне бірнеше мәрте шабуыл жасалған. Осының әсерінен Дубай әуежайы жұмысын тоқтатқан.