Медицина қызметкеріне шабуыл жасағаны үшін сотталу: өзгеріс күшіне енді
2026 жылы 7 наурызда Қазақстанда медицина қызметкерлеріне қатысты физикалық күш көрсету мен қоқан-лоққы жасағаны үшін жазалау туралы Қылмыстық кодекске енгізілген өзгерістер өз күшіне енді, деп еске салды Денсаулық сақтау министрлігі.
Өзгерістер Қылмыстық кодекске медицина қызметкерлерінің, сондай-ақ, жедел медициналық жәрдем бригадалары жүргізушілерінің қызметтік міндеттерін атқару кезінде олардың өміріне, денсаулығына және қауіпсіздігіне қол сұққаны үшін қылмыстық жауапкершілікті белгілейтін жаңа бапты енгізуді қарастырады.
Құжат нормаларына сәйкес:
- күш қолдану қатерін төндіргені үшін – 200-ден 500 айлық есептік көрсеткішке (АЕК) дейінгі мөлшерде айыппұл, не сол мөлшерде түзеу жұмыстары, не 300 сағатқа дейінгі қоғамдық жұмыстар, не екі жылға дейінгі мерзімге бас бостандығын шектеу немесе айыру жазасы қарастырылған;
- аталған әрекеттер ауырлататын мән-жайлар кезінде жасалса, жаза қатаңдатылып, екі жылдан үш жылға дейінгі мерзімге бас бостандығын шектеу немесе айыру жазасы қолданылады;
- өмірге және (немесе) денсаулыққа қауіпті емес күш қолданғаны үшін – 500-ден 1000 АЕК-ке дейінгі мөлшерде айыппұл, не сол мөлшерде түзеу жұмыстары, не 600 сағатқа дейінгі қоғамдық жұмыстар, не екі жылдан үш жылға дейінгі мерзімге бас бостандығын шектеу немесе айыру жазасы қарастырылған;
- өмір мен денсаулыққа қауіпті күш қолдану 5 жылдан 10 жылға дейінгі мерзімге бас бостандығынан айырумен, ал ауырлататын мән-жайлар болған жағдайда – 7 жылдан 12 жылға дейінгі мерзімге бас бостандығынан айырумен жазаланады.
Заңнамалық өзгерістермен қатар, медициналық ұйымдарда медицина қызметкерлерінің жұмыс орындарындағы қауіпсіздігін қамтамасыз етудің қосымша шаралары енгізілуде. Орта мерзімді перспективада мыналар жоспарланған:
- 2100-ден астам фельдшерді бейнежетондармен қамтамасыз ету;
- 636 қабылдау бөлімінде дабыл түймелерін орнату;
- бейнебақылау жүйелерін интеллектуалды аналитикамен интеграциялау;
- еліміздің 152 стационарында тәулік бойы жұмыс істейтін полиция бекеттерінің жұмысын қамтамасыз ету.
2019 жылдан бері Қазақстанда дәрігерлерге, фельдшерлерге, медбикелерге және денсаулық сақтау жүйесінің басқа да қызметкерлеріне шабуыл жасаудың 280 астам факт тіркелген.
