Соңғы жылдары елімізде туризм мен іскерлік белсенділік артып келеді. Алайда, онымен бірге қонақ үй қызметтерінің құны да «шарықтап» бара жатқандай. Ұлттық статистика бюросының соңғы үш жылдың мәліметіне көз жүгіртсек, республика бойынша қонақ үйлерде бір тәулік түнеудің орташа бағасы айтарлықтай өскенін байқаймыз. Kursiv Media өңірлер бойынша шолу жасап көрді.
Статистика не дейді?
Егер 2024 жылы еліміз бойынша орташа баға 15 208 теңге болса, 2025 жылы ол 19 039 теңгеге дейін көтерілді. Ал 2026 жылдың ақпан айындағы көрсеткіш рекордтық 26 248 теңгені құрап отыр. Бұл небәрі екі жыл ішінде бағаның 70%-дан астамға өскенін көрсетеді.
Қымбат қалалар: Көш басында кімдер?
Еліміздің қаржылық және мәдени орталығы – Алматы қаласы баға жағынан абсолютті көшбасшы. Мұнда бір тәуліктің құны 33 590 теңгеге жеткен. Алматының «қымбат» екені таңсық емес, бірақ өзге өңірлер де қалыспай келеді:
- Орал (26 666 тг) – Батыстың бұл қаласы күтпеген жерден баға жағынан екінші орынға шықты.
- Петропавл (22 486 тг) – Солтүстікте де жайлылықтың құны арзандап тұрған жоқ.
- Қонаев (20 954 тг) және Шымкент (20 948 тг) – бұл қалалар 20 мыңдық межеден сенімді түрде асып түсті.
Қызығы сол, елордамыз Астана қаласы 20 224 теңгемен Алматыдан ғана емес, Орал мен Петропавлдан да «арзан» болып шықты.
Арзан қонақ үй: Түркістан феномені
Деректердің ішіндегі ең қызықты жайт – Түркістан қаласы. Соңғы үш жыл бойы (2024, 2025, 2026) мұнда орташа баға бір тиын да өзгермеген: 15 875 теңге. Инфляция мен нарықтағы құбылыстарға қарамастан, рухани астанамыз өз бағасын нық ұстап тұр. Бұл туристер үшін өте тартымды фактор.
Сондай-ақ, Жезқазған (18 375 тг) және Атырау (16 151 тг) қалаларында да соңғы екі жылда баға тұрақтылығы байқалады.
Бюджеттік демалыс іздесеңіз…
Қалтаны қатты жұқартқысы келмейтін саяхатшылар үшін ең тиімді бағыттар:
- Семей – 11 656 теңге (Республикадағы ең төменгі баға).
- Ақтау – 12 320 теңге. Теңіз жағасындағы қала үшін бұл өте қолайлы көрсеткіш.
- Талдықорған – 14 059 теңге.
Жалпы алғанда, Қазақстанның батысы мен оңтүстігіндегі ірі мегаполистерде қымбатшылық байқалып отыр. Бағаның мұндай қарқынмен өсуі сервистің жақсаруына ма, әлде сұраныстың жоғарылығына байланысты ма – ол бөлек әңгіме.
