2026 жылғы Рамазан айының күнтізбесіне сәйкес, қасиетті Қадір түні наурыздың 16-нан 17-не қараған түнге түсіп тұр. Ислам дінінде «мың айдан да қайырлы» деп ұлықталатын бұл түн – рухани жаңару мен тілектердің қабыл болатын уақыты.
Қазақстан мұсылмандары діни басқармасы (ҚМДБ) биылғы Қадір түніне қатысты негізгі мәліметтер мен оқылуы тиіс басты дұғаны ұсынды.
Қадір түнде оқылатын дұға
Ардақты Пайғамбарымыз Мұхаммед (с.ғ.с.) бұл түні Алладан кешірім сұрауды өсиет еткен. Айша анамызға (р.а.) үйреткен ең басты дұғасы мынадай:
Транскрипциясы: «Аллаһумма иннәкә ‘афуун, тухиббуль ‘афуа фа’фу ‘анни».
Қазақша мағынасы: «Уа, Алла! Расында, Сен – Кешірімдісің, кешіруді жақсы көресің. Ендеше, мені кешіре көр!»
Бұл түнді қалай өткізу керек?
Қадір түні жай ғана ұйықтамай отыру емес, ол саналы түрде құлшылыққа арналған уақыт.
Намаз бен Құран: Түнгі намаздарды (тәһаджуд) оқу және Құран аяттарын тыңдау немесе оқу.
Тәубе ету: Өткен қателіктер үшін кешірім сұрап, болашаққа жақсы ниет бекіту.
Садақа беру: Қайырымдылық жасау – бұл түннің сауабын еселей түседі.
Дұға тілеу: Өзіңізге, отбасыңызға және ел амандығы үшін тілек айту.
Еске сала кетейік, биыл Ораза айт мерекесі 20 наурызға түсіп отыр.
