Экология және табиғи ресурстар министрі Ерлан Нысанбаев Қазақстанда бәйшешек пен сирек кездесетін қызғалдақтарды жұлуға заңмен тыйым салынғанын тағы бір мәрте еске салды.
«Қызғалдақтар мен бәйшешектерді жұлуға бізде қатаң жаза қарастырылған. Сондықтан бұл өсімдіктерді жұлмауға кеңес беремін. Олар онша көп емес, әрі бекерден-бекер бұл тізімге енгізілген жоқ. Әлемде күн сайын немесе жыл сайын өсімдіктер мен жануарлардың көптеген түрі жойылып жатыр. Кез келген өсімдік пен жануар түрінің жоғалуы – толық зерттелмеген үдеріс, бірақ ол орны толмас жағымсыз салдарға әкелуі мүмкін. Сондықтан табиғатты қорғаңыздар», – деді министр мәжіліс кулуарында.
Нысанбаев Қазақстандағы сирек кездесетін өсімдіктер тізімі мыңнан асып жығылатынын айтты. Бәйшешектер де сорлардың қатарына жатады.
«Сирек әрі жойылып бара жатқан өсімдік түрлерін жұлуға болмайды, бәйшешектер де жойылып бара жатқан өсімдіктердің қатарына кіреді», – деді министр.
Еске салайық, өткен жылы Түркістан облысында далада өсіп тұрған қызғалдақты жұлған келіншектің басы дауға қалған болатын. Оған 12 млн теңгеге дейін айыппұл салынуы мүмкін екені хабарланған.
