16 наурыз күні өтетін Премьер-лиганың екінші туры аясындағы «Қайрат» – «Ақтөбе» матчына билет қалмады. Бұл туралы «Қайрат» футбол клубы хабарлады.
Сатылымға 11 наурыз күні сағат 15:00-де шыққан билеттер 24 сағатқа жетпей толықтай өтіп кеткен.
Стадионда ине шаншар жер болмайды
Орталық стадионда өтетін бұл кездесуге халықтың қызығушылығы өте жоғары. Билеттердің SOLD OUT болуы алматылық және ақтөбелік жанкүйерлердің бұл тартысты асыға күткенінің дәлелі.
Жанкүйерлерге маңызды ақпарат:
Матч 16 наурыз күні сағат 19:00-де басталады. Алайда, стадиондағы халықтың көптігіне байланысты ұйымдастырушылар жанкүйерлерге мынадай кеңестер береді:
- Ерте келу: Стадион қақпалары матч басталардан 3 сағат бұрын, яғни 16:00-де ашылады. Кезекте тұрып қалмау үшін ертерек келген жөн.
- Кіру жолдары: Стадионға үш жақтан кіруге болады: Абай даңғылы, Сәтбаев және Байтұрсынов көшелері тарапынан.
- Тексеріс: Қауіпсіздік шараларын ескере отырып, тексерістен жылдам өту үшін өзіңізбен бірге артық заттарды алмағаныңыз абзал.
«Қайрат» пен «Ақтөбе» ойыны қазақ футболының классикасы. Екі клубтың да амбициясы жоғары, ал жанкүйерлер арасындағы текетірес ойынға қосымша атмосфераны сыйлайды.
