2025 жылдың қорытындысы бойынша құрылыс саласы Қазақстан экономикасының негізгі драйверінің бірі ретіндегі орнын нығайтты. Сектордың өсу қарқыны 15,9%-ды құрап, өзге салалар арасындағы ең жоғары көрсеткіштердің бірін көрсетті. Finprom.kz сарапшыларының жазуынша бұл динамика құрылыс саласының жалпы ішкі өнімдегі (ЖІӨ) үлесінің 6,1%-ға (9,6 трлн теңге) жетуіне негіз болды.
Рақымбаевтың компаниясы көш бастады
Құрылыс секторы мемлекеттік бюджеттің қалыптасуына айтарлықтай үлес қосатын донор сала саналады. 2025 жылы саланың 26 ірі кәсіпорны бюджетке 312 млрд теңгеден астам салық төлеген. Бұл өткен жылғы көрсеткіштен 10%-ға жоғары.
Салық аударымдар көлемі бойынша BI Group холдингі өзге қатысушылардан айтарлықтай озып, көш бастады. Холдинг бюджетке 90 млрд теңге салық төлеген, бұл компания үшін бір жыл ішіндегі 40%-дық өсімді көрсетеді.
Соңғы бес жылда аталған топтың мемлекетке төлеген жиынтық салығы шамамен 300 млрд теңгені құрады.
2026 жылғы Forbes жаһандық рейтингінің мәліметі бойынша, Рақымбаев 1,1 млрд доллар байлығымен әлемдік тізімде 3185-орынға тұрақтап, халықаралық деңгейдегі ірі кәсіпкерлер қатарына енді.
Ірі құрылыс компанияларының иелері кім?
2025 жылғы есеп бойынша құрылыс саласындағы ең ірі салық төлеуші бес компанияның көрсеткіштері төмендегідей:
| Компания атауы | Салық мөлшері (2025 ж.) | Акционері | Қызмет бағыты |
| BI Group | 90 млрд тг | Айдын Рақымбаев | Тұрғын үй және инфрақұрылым |
| «ҚазАвтоЖол» ҰК» АҚ | 28,2 млрд тг | Мемлекеттік компания | Автожолдарды басқару |
| «Сенімді Құрылыс» ЖШС | 26,3 млрд тг | Әділбек Шаңқозов | Тау-кен секторындағы құрылыс |
| BAZIS-A | 24,2 млрд тг | Александр Белович | Тұрғын үй және азаматтық құрылыс |
| Integra Construction KZ | 22,7 млрд тг | Шахмұрат Мүтәліп | Көлік инфрақұрылымы |
Нарықтың ірі қатысушылары арасында маңызды құрылымдық трансформациялар байқалады. Мәселен, «Сенімді Құрылыс» ЖШС-нің салықтық аударымдары өткен жылмен салыстырғанда 54,5%-ға азайған. Ашық дереккөздерге сүйенсек, бұл компания 2025 жылдың наурыз айында өзге құрылыммен бірігуіне байланысты есептен шығарылған.
