Қаржы министрлігінің Мемлекеттік кірістер комитеті ЕАЭО елдерінен импортталатын бірқатар тауарлар үшін ең төменгі бағаны белгіледі. Жаңа ережелер 2026 жылдың 1 сәуірі мен 30 маусымы аралығында күшінде болады.
Бұл шара Еуразиялық экономикалық одаққа мүше мемлекеттерден тауар әкелгенде кедендік әкімшілендіруді жақсарту мен өнім құнын әдейі төмендетіп көрсету арқылы салықтан жалтару әрекеттерімен күресуге бағытталған.
Азық-түлік қауіпсіздігін қамтамасыз ету және ішкі нарықтағы тепе-теңдікті сақтау мақсатында негізгі тұтыну тауарларына келесідей минималды баға қойылды: көкөніс өнімдерінен картоп – 90 теңге, ақ қырыққабат 72 теңге және сәбіз 106 теңге болып бекітілді.
Дән және ұн өнімдері бойынша бидайдың тонналық құнына негізделген келісі 75-83 теңге, бидай ұны 175 теңге, ал кептірілген макарон өнімдері 248 теңгені құрайды. Сүт өнімдері санатында сүзбе 1 822 теңгеден, балқытылған ірімшіктер 2 985 теңгеден төмен бағаланбауы тиіс.
Ет өнімдеріне келетін болсақ, шикі шұжықтар 2 063 теңге, ал өзге шұжық түрлері 1 521-1 634 теңге аралығында белгіленді. Сондай-ақ, күнбағыс майының литрі 451 теңге, жұмыртқаның данасы 41 теңге деңгейінде тұр.
Алкоголь және өнеркәсіп тауарларының құны
Спиртті ішімдіктер нарығындағы бақылауды күшейту үшін арақтың бір литріне 1 268 теңге, ал коньяк өніміне 3 101 теңге көлемінде ең төменгі шек қойылды.
Сонымен қатар, өнеркәсіптік және химиялық тауарлар сегментінде де нақты көрсеткіштер бар: минералды немесе химиялық тыңайтқыштардың келісі 205-222 теңге, дайын антифриздер литріне 322 теңге, ал органикалық еріткіштер 234 теңге болып бекітілді.
Құрылыста қолданылатын минералды мақтаның келісі 203 теңгені құрайды. Бұл бағалар кедендік рәсімдеу кезінде негізгі бағдар ретінде пайдаланылады.
Қазақстанда өндірілмейтін тауарларға қойылатын талаптар
Еліміздің климаттық жағдайына байланысты өндірілмейтін, бірақ сырттан көптеп әкелінетін өнімдер үшін де бағалық шектеулер енгізілді.
Атап айтқанда, импорттық банандардың келісі 403 теңге, апельсиндер – 277 теңге, мандариндер – 269 теңге және балғын құрма 208 теңге болып белгіленді.
Сонымен қатар, Agaricus туысына жататын саңырауқұлақтардың келісі 754 теңге, ал мұздатылған жидек 1 432 теңге көлемінде нақтыланды.
